क्षेत्रपाटी निःशुल्क चिकित्सालय भवन अब अत्याधुनिक

काठमाडौं– काठमाडौंको क्षेत्रपाटीस्थित क्षेत्रपाटी निःशुल्क चिकित्सालयले ३५ करोड रुपैयाँ लागतमा आठतले अत्याधुनिक नयाँ भवन बनाउने भएको छ। काठमाडौं महानगरपालिका–१७ मा रहेको अस्पतालले आफ्नै जग्गामा अत्याधुनिक आठतले भवन बनाउन लागेको हो। 

काठमाडौं महानगरपालिकाका मेयर विद्यासुन्दर शाक्य र उपमेयर हरिप्रभा खड्गी (श्रेष्ठ) ले भवनको बिहीबार संयुक्त रुपमा शिलान्यास गरे। शिलान्यास कार्यक्रममा आयोजित समारोहलाई सम्बोधन गर्दै शाक्यले क्षेत्रपाटी निःशुल्क चिकित्सालय नयाँ युगमा प्रवेश गरेको बताए। उनले भने, ‘यहाँ वडा अध्यक्षज्यूहरु, उपमेयरज्यू र छौं, फेरि पनि जितेर आउने हामीमध्येबाटै कोही हुन्छ, त्यसैले जनताको सेवा गर्ने क्षेत्रपाटी चिकित्सालयले रकम अभावमा काम गर्न पाइनौं भनेर गुनासो गर्ने ठाउँ दिन्नौं।’ 

उपमेयर खड्गी (श्रेष्ठ) ले चिकित्सालयले काठमाडौंभित्रका कोर सिटीका जनताको सेवामा कुनै कसर बाँकी नराखेको बताइन्। उनले भनिन्, ‘काठमाडौंमा फोहोरको समस्या छ, खानेपानीको समस्या छ, त्यसैले स्वास्थ्य संस्थाको धेरै नै महत्व छ।’ 

महानगरपालिकाले उपलब्ध गराएको पाँच करोड तथा अन्य दाताहरुले उपलब्ध गराएको थप डेड करोड रुपैयाँसहित निर्माण सुरु गरिएको अस्पताल दाताहरुबाट संकलित सहयोग रकमबाट निर्माण सम्पन्न गर्ने लक्ष्य राखिएको व्यवस्थापन समितिका अध्यक्ष डा. मनोजमान श्रेष्ठले बताए। 

क्षेत्रपाटी निःशुल्क चिकित्सालय २०१३ माघ २३ गते १० रुपैयाँको कुल पुँजीबाट सुरु भएको नेपालको पुरानो सामुदायिक स्वास्थ्य संस्था हो। तत्कालीन सञ्चार, यातायात तथा नहरमन्त्री गणेशमान सिंहले २०१६ माघ २३ गते भवन शिलान्यास गरेर भौतिक पूर्वाधारमा अघि बढेको अस्पतालले हाल दुईवटा अत्याधुनिक भवनमा सम्पूर्ण स्वास्थ्य सेवा प्रवाह गर्दै आएको छ। चिकित्सालयमा मुटुसम्बन्धी अत्याधुनिक उपचार सेवा उपलब्ध छ भने दैनिक १०० सिलिन्डर अक्सिजन उत्पादन गर्ने प्लान्टसहित अत्याधुनिक भेन्टिलेटर सुविध छ।