भारतबाट फर्केर निर्धक्क हिँडडुल

सुर्खेत– सल्यानको बनगाड कुपिण्डे नगरपालिका–१२ का ३६ वर्षिय एक व्यक्ति चैत १० गते भारतबाट घर फर्किए । मजदुरीका लागि भारत गएका उनी त्यहाँ कोरोना भाइरसको त्रास फैलिएपछि घर फर्किएका थिए ।

सरकारले भनेको थियो– विदेशबाट आउने जोकोही १४ दिन क्वारेन्टाइनमा बस्नू । तर उनी क्वारेन्टाइनमा बसेनन् ।

नेपालगञ्ज र सुर्खेतको हेल्थ डेस्कमा स्वास्थ्य चेक गरेपछि उनलाई स्वस्थ छु भन्ने लाग्यो र घर पुगे । गाउँमा पुगेपछि पनि कसैले होम क्वारेन्टाइनमा बस्न सल्लाह दिएनन् । उनी घर पुगेको हप्ता दिन नहुँदै परिवारका पाँच जनालाई ज्वरो आउने, टाउको दुख्ने र खोकी लाग्ने भयो । गाउँ नै त्रसित बन्यो । कोरोनासँग मिल्दोजुल्दो लक्षण देखा परेपछि जनप्रतिनिधिको दबाबमा बल्ल उनी परिवारसहित क्वारेन्टाइनमा बसेका छन् ।

उनीमात्रै होइन, जिल्लामा रोजगारीका लागि भारत र अन्य मुलुक गएका सयौं नागरिक गाउँ फर्किएका छन् । तर जिल्लामा जम्मा १४ जनामात्रै क्वारेन्टाइनमा बसेका छन् । प्रमुख जिल्ला अधिकारी शिवराम पोखरेलका अनुसार विदेशबाट आएकाहरु क्वारेन्टाइनमा नबस्दा गाउँमा त्रास नै फैलिएको छ । तर विदेशबाट आएकाहरुलाई उच्च निगरानीमा राखिएको उनको भनाइ छ ।

त्यस्तै रुकुम पश्चिमको आठबीसकोट नगरपालिकाका २० वर्षीय एक युवक केही दिनअघि भारतको केरलबाट फर्किए । उनी पनि क्वारेन्टाइमा बस्नुको सट्टा गाउँमै घुम्दै हिँडडुल गर्न थाले ।

घर फर्किएको केही दिनमै उनमा उच्च ज्वरो देखिएपछि कोरोनाको आशंकामा गाउँ नै त्रसित भयो । अन्ततः स्थानीयको दबाबपछि ती युवा क्वारेन्टाइनमा बसे । तर नमुना परीक्षण गर्दा उनलाई कोरोनाको संक्रमण भने देखिएन ।

हप्ता दिनअघि कोरोनाले त्रसित रुकुम पश्चिममा पनि क्वारेन्टाइनमा बस्नेको संख्या न्यून रहेको छ । भारत तथा तेस्रो मुलुकबाट सयौं नागरिक भित्रिएका छन् । तर हालसम्म अधिकांशले क्वारेन्टाइनमा बस्न मानेका छैनन् ।

अहिलेसम्म सदरमुकामस्थित मुसीकोट खलंगा बहुमुखी क्याम्पसको क्वारेन्टाइनमा ७ र चौरजहारीस्थित शितल माध्यमिक विद्यालयको क्वारेन्टाइनमा १६ जना मात्र बसेका छन् । प्रमुख जिल्ला अधिकारी उपेन्द्रराज पौड्यालका अनुसार भारतबाट ४ सय ६१ र अन्य तेस्रो मुलुकबाट २७ गरी ४ सय ८८ जना जिल्ला भित्रिएका छन् । अधिकांश क्वारेन्टाइनमा बस्न मान्दैनन् ।

त्यस्तै जाजरकोटमा पनि अहिलेसम्म ४ जना मात्रै क्वारेन्टाइनमा बसेका छन् । जबकि विदेशबाट २ सय ५ जना नागरिक गाउँमा पुगेका छन् । तर उनीहरु क्वारेन्टाइन नभई सेल्फ क्वारेन्टाइनमा बसेको प्रमुख जिल्ला अधिकारी जनकराज पन्तले जानकारी दिए ।

विदेशबाट आएका नागरिकका कारण स्थानीय त्रसित बनेपछि स्वास्थ्यकर्मी र जनप्रतिनिधिको निगरानीमा राखिएको छ । जाजरकोटमा पनि अधिकांश नागरिकहरु क्वारेन्टाइनमा बस्न मान्दैनन् ।

त्यस्तै मुगुको मुगुमकार्माेरोङ गाउँपालिकाले ६० बेडको क्वारेन्टाइन तयार पारेको छ । गाउँपालिका अध्यक्ष छिरिङ काप्रे लामाका अनुसार काठमाडौं, नेपालगञ्ज, सुर्खेत लगायतका शहरबाट १ सय ६२ जना नागरिक गाउँमा फर्किएका छन् । तर उनीहरु कोही पनि क्वारेन्टाइनमा बस्न मान्दैनन् ।

प्रहरी प्रशासन नहुँदा सहरबाट गाउँ आएकालाई क्वारेन्टाइनमा बसाल्न समस्या भएको गाउँपालिकाले जनाएको छ । सल्यान, जाजरकोट र मुगुमात्रै होइन, शहर र विदेशबाट गाउँमा पुगेका अधिकांश कर्णालीका नागरिकहरु हालसम्म क्वारेन्टाइनमा बस्न मानेका छैनन् । कोरोना संक्रमणको आशंका गरिएकाहरु क्वारेन्टाइनमा नबस्दा कोरोनाको त्रास र जोखिम दुबै बढेको हो ।

प्रहरीलाई हैरानी

विदेशबाट आएकाहरु क्वारेन्टाइनमा नबस्दा प्रहरीले हैरानी व्यहोर्नु परेको छ । सकेसम्म घरमा पुगेर क्वारेन्टाइनमा बसाल्नु, नभए होम क्वारेन्टाइनमा बस्न सल्लाह दिँदादिँदै हिजोआज प्रहरी हैरान बनेका हुन् ।

प्रहरीले विदेशबाट आएकाहरुलाई घरमै गएर सम्झाइ बुझाइ गरेको छ । जिल्ला प्रहरी कार्यालय सल्यानका अनुसार कपुरकोट गाउँपालिकाले विदेशबाट फर्किएका २२ जनाको घरमै पुगेर होम क्वारेन्टाइनमा बस्न आग्रह गरेको छ । प्रहरीको अगुवाईमा जनप्रतिनिधि र स्वास्थयकर्मीहरु घरमै पुगेर कोरोना सम्बन्धी परामर्श गरेर होम क्वारेन्टाइनमा बस्न आग्रह गर्दै आएका छन् ।

भारतबाट फर्किएका १३ जना, साउदीबाट फर्किएका ५ जना, कतारबाट फर्किएका २ जना र मलेसियाबाट फर्किएका २ जना गरी २२ जना विदेशबाट फर्किएको स्वास्थ्य शाखा प्रमुख अरुण दाहालले जानकारी दिए । क्वारेन्टाइनमा बस्न नमानेका उनीहरुलाई दुई साता घरको छुट्टै कोठामा बस्न र अरु ब्यक्तिसँगको सम्पर्कमा नजान आग्रह गरिएको उनले जनाए ।