तीजमा बाहिरैबाट पशुपतिनाथको दर्शन [तस्बिरहरू]

काठमाडौं- भाद्र शुक्ल तृतीयाका दिनमा मनाइने हरितालिका (तीज) पर्व आज देवादिदेव महादेवको पूजा आराधना गरी मनाइँदैछ। 

तीजको अवसरमा मन्दिर नखुले पनि भक्तजनहरू पशुपतिनाथ मन्दिर परिसर पुगेका छन्। कोरोनाभाइरस महामारी कायमै रहेको भन्दै भक्तजनलाई मन्दिर भित्र प्रवेश दिइएको छैन।

पूजाअर्चनाका लागि पशुपतिनाथ पुगेका भक्तजनहरू बाहिरैबाट दर्शन गरेर फर्किरहेका छन्। नयाँ भेरियन्टसहितको कोरोना संक्रममण तीव्र भएपछि गत वैशाख १० गतेदेखि भक्तजनका लागि बन्द गरिएको पशुपतिनाथ मन्दिर यही शुक्रबारदेखि खोलिने भएको छ।

कोरोना जोखिम कम हुन थालेपछि शुक्रबार बिहान ५:३० बजेदेखि मन्दिर खुला गर्न लागिएको पशुपति क्षेत्र विकास कोषका कार्यकारी निर्देशक डा. घनश्याम खतिवडाले जानकारी दिए। साढे चार महिना भक्तजनका लागि मन्दिर बन्द गर्नुपरेकामा बिहीबार क्षमापूजा गर्ने तयारी कोषको छ।