कोरोना भाइरसलाई जितेपछि आंशिक रुपमा खुल्दै वुहान

एजेन्सी- विश्वव्यापी महामारी बनेको कोरोना भाइरस (कोभिड–१९) को उद्गमस्थल चीनको हुबेई प्रान्तस्थित वुहान सहर विस्तारै खुल्दै गएको छ।

झण्डै दुई महिना लामो आइसोलेसनपछि वुहानका नागरिक घर बाहिर निस्किन थालेका छन्।

शनिबार वुहानका रेल स्टेशनहरुमा यात्रुहरुको भिड देखिएको छ।

वुहानमा मानिसहरुलाई प्रवेश गर्न दिन थालिएको छ। तर त्यहाँबाट बाहिर जान भने अनुमति छैन।

हुबेईको राजधानी वुहानमा ५० हजार भन्दा बढी कोरोना संक्रमित भेटिएका थिए। जसमा झण्डै ३ हजारको मृत्यु भएको छ।

अहिले वुहानमा कोरोना भाइरसको संक्रमण निकै घट्दै गएको छ। शुक्रबार दिनभरमा जम्मा ५४ जना नयाँ संक्रमित भेटिएका छन्। उनीहरु सबै विदेशी नागरिक हुन्।

केही दिनयता देखिएका नयाँ संक्रमितहरु सबै विदेशी नागरिकहरु भएपछि चीनले विदेशी नागरिकलाई चीन प्रवेशमा रोक लगाएको छ।

चीनको भिषा भएका तथा बसोबासको अनुमति पाएकालाई समेत चीनले केही समयका लागि चीन प्रवेशमा रोक लगाएको छ।

वुहानमा अहिले विदेशी विमानहरु हप्तामा बढीमा एउटा आउने अनुमति दिइएको छ भने आन्तरिक उडान पनि खासै हुन सकेका छैनन्।

जोन हप्किन्स विश्वविद्यालयका अनुसार विश्वभर कोरोना भाइरसबाट झण्डै ६ लाख मानिस संक्रमित भएका छन्। जसमा झण्डै २८ हजार मानिसको मृत्यु भइसकेको छ।

अमेरिकामा सबैभन्दा बढी १ लाख ४ हजार मानिस संक्रमित भएका छन्।