भारतको जनता कर्फ्युको प्रभाव सीमा नाकामा

जनकपुरधाम- कोरोना संक्रमणको जोखिमबाट जोगिन भारतीय प्रधानमन्त्री नरेन्द्र मोदीले गरेको जनता कर्फ्यु आह्वानको प्रभाव नेपालको भारतीय सीमा नाकामा समेत परेको छ।

बिहार राज्यसँग जोडिएको धनुषाका नाकाहरु सुनसान देखिएका छन्।

जिल्लाका अन्य सम्पूर्ण नाकाहरु आइतबारदेखि बन्द रहे पनि जटही र खजुरी नाका खुल्ला छ। धनुषाका दुई प्रमुख नाकाहरु खुल्ला रहे पनि आवत–जावत ठप्प छ।

जटही नाकाबाट आइतबार चार बजेसम्म जम्मा ७० जना नेपाल प्रवेश गरेको हेल्प डेस्कमा खटिएका सितेश कर्णले जनाए। प्रवेश गर्नेहरुमध्ये कतिपय नेपालीसमेत रहेका छन्।

भारतमा आइतबार जनता कर्फ्यु रहेकोले आवतजावत प्रभावित भएको उनले बताए।

अन्य दिन दैनिक पाँच सयभन्दा बढी मानिस आवतजावत गर्ने गरेको नाकामा खटिएका एक सशस्त्र प्रहरीले बताए। तर विगत केही दिनयता नाकाबाट आवतजावत गर्नेको संख्यामा कमी आएको उनले बताए।

नेपाली सीमातर्फ केही सर्वसाधारणहरु बाहिर देखिए पनि जटही नाकाको सीमा पारी भने सुनसान छ। बिहारमा आइतबार कोरोना संक्रमणले दुईजनाको ज्यान गएपछि सीमा पारी थप त्रास बढेको छ।