सतुंगलबाट साढे ५ लाख थान मास्क बरामद

काठमाडौं– प्रहरीले काठमाडौंको सतुंगलबाट करिब साढे ५ लाख थान सर्जिकल मास्क बरामद गरेको छ।

चन्द्रागिरि नगरपालिका–१० स्थित विष्णुदेवी गोदाममा १ सय ७७ बोरामा लुकाई राखेको अवस्थामा साढे ५ लाख थान मास्क बरामद गरेको थानकोट प्रहरी वृत्तले जनाएको छ।

थानकोट प्रहरी वृत्तका प्रहरी निरीक्षक राजेश शर्माका अनुसार लुकाइछिपाई राखेको उक्त मास्कसहित सुरत गोयल र महेश्वरीलाई नियन्त्रणमा लिइएको छ।

प्रतिमास्क २–३ रूपैयाँ मूल्य पर्ने उक्त मास्क बजारमा ४०–५० रूपैयाँमा बिक्री गर्ने गरेको खुलेपछि गोदाममा छापा मारेको प्रहरीले जनाएको छ।

महानगरीय प्रहरी परिसरले शनिबार कपनबाट १ लाख ६८ हजार थान र आइतबार डल्लुबाट ७८ हजार थान मास्क बरामद भएको थियो।

कोरोना भाइरसको संक्रमणको त्रासको फाइदा उठाउँदै व्यापारीले मास्सको कृत्रिम अभाव देखाउदै चर्को मूल्य असुलेर बिक्री गरिरहेको भेटिएपछि प्रहरीले सक्रियता बढाएको छ।