युरोपमा काेरोना नियन्त्रणबाहिर : एकैदिनमा ५०८ को मृत्यु

काठमाडौं- चीनको वुहानबाट सुरु भएको कोरोना भाइरसकाे महामारी युराेपमा तीव्र गतिमा फैलिएको छ।

इटाली, स्पेन, बेलायत र फ्रान्समा कोरोनाको महामारी नियन्त्रबाहिर पुगेको छ। आइतबार एकै दिनमा  यी चार देशमा गरी ५ सय ८ जनाको मृत्यु भएको बीबीसीले जनाएको छ।

इटालीमा आइतबार ३ सय ६८ जनाको मृत्यु भएको छ। इटालीमा कोरोना भाइरसबाट ज्यान गुमाउनेको संख्या १८ सय ९ पुगेको छ।

स्पेनमा आइतबार ९७ जनाकाे मृत्यु भएको छ। याेसहित मृतकको संख्या २ सय ८८ पुगको छ भने फ्रान्समा आइतबार २९ जनाको मृत्यु भएको छ।

बेलायतमा आइतबार १४ जनाले ज्यान गुमाएका छन्। विश्वभर कोरोना भाइरसबाट मृत्यु हुनेको संख्या भने ६ हजार नाघेको बीबीसीले जनाएको छ।

चीनपछि कोरोनाबाट सबैभन्दा बढी प्रभावित इटालीमा २४ हजार ७४७ जना संक्रमित बनेका छन्। स्पेनमा ७ हजार ५५३ संक्रमित भेटिएका छन् भने फ्रान्समा संक्रमितको सङ्ख्या ५ हजार ४०० पुगेको छ। 

पछिल्लो २४ घण्टामा स्विट्जरल्यान्डमा ८ सय नयाँ संक्रमित भेटिएका छन्।

अमेरिकामा अहिलेसम्म ६२ जनाले कोरोनाकै कारण ज्यान गुमाएका छन् भने ३ हजार २४४ जना संक्रमित भएका छन्।

अहिलेसम्म विश्वभर कोरोनाभाइरसबाट १ लाख ६२ हजार ६८७ जना संक्रमित भएका छन्  जसमध्ये ८१ हजार ३ जना चीनका रहेका छन्। चीनका क्रमश नयाँ संक्रमण दर र कोरोनाबाट ज्यान गुमाउनेको संख्या घट्दै गएको छ।