कर्णाली प्रदेशबाट श्रम स्वीकृति दिन बन्द

सुर्खेत । कोरोना भाइरस (कोभिड–१९) को त्रासका कारण प्रदेश पनि श्रम स्वीकृति बन्द भएको छ ।

सरकारले वैदेशिक रोजगारीमा जाने कामदारको श्रम स्वीकृति स्थगित गरेपछि प्रदेशबाट पनि श्रम स्वीकृति बन्द गरिएको श्रम तथा रोजगार कार्यालय सुर्खेतले जनाएको छ । शुक्रबार सूचना जारी गर्दै कार्यालयले अर्काे सूचना नआएसम्म श्रम स्वीकृति बन्द गरिएको जनाएको छ ।

कार्यालय निमित्त वरिष्ठ श्रम अधिकृत सुनिताकुमारी दर्लामीले दिएको जानकारी अनुसार शुक्रवारदेखि देशभरका श्रम तथा रोजगार स्वीकृति बन्द गरिएको छ । कोरोनाको सन्त्रास कम नभएसम्म श्रम स्वीकृति बन्द गरिएको उनको भनाइ छ ।

संक्रमणको विरुद्ध उच्च सतर्कता अपनाउँदै प्रधानमन्त्री तथा मन्त्रीपरिषदले २९ गते गरेको निर्णय अनुसार वैदेशिक रोजगारका लागि दिइने श्रम स्वीकृत र पुनः श्रमस्वीकृति (संस्थागत र व्यक्तिगत) स्थगित गरिएको थियो ।