१७ लाख घुससहित नापी र मालपोतका कर्मचारी पक्राउ

भैरहवा- १७ लाख घुस रकमसहित नापी कार्यालय भैरहवामा कार्यरत अधिकृतहरु पक्राउ परेका छन्।

अख्तियार दुरूपयोग अनुसन्धान आयोगको बुटवल कार्यालयले नापी अधिकृत सरोज श्रेष्ठ, सर्वेक्षक तिर्थराम भण्डारी र सर्वेक्षक थानेश्वर चौधरीलाई पक्राउ गरेको हो।

यसैगरी मालपोत कार्यालयका नासु धर्मराज पन्थी, लेखापढी व्यवसायी जीवन शर्मा, मतियार राज कुमार अर्याल पनि पक्राउ परेका छन्।

उनीहरु भैरहवाको सिद्धार्थ बसपार्क नजिकै सेवाग्राहीसँग रकम लिँदैगर्दा पक्राउ परेको अख्तियार दुरूपयोग अनुसन्धान आयोग बुटवल कार्यालयका प्रमुख भीस्म भुसालले बताए।

जग्गाको कित्ता काट मिलाउने भन्दै नापी र मालपोत कार्यालयका अधिकृतहरुले उक्त रकम सेवाग्राहीसंग लिएको बुझिएको छ।

सरकारले कित्ता काट रोकेपछि मालपोत र नापीका अधिकारीहरुसंगको मिलोमतोमा जग्गा दलालहरुले नक्कली अंशबन्डा गरेर कित्ता काट गरी जग्गा बिक्री वितरण गर्दै आएका छन्।