होलीमा अत्याधिक मदिरा पिउँदा धनुषामा पाँचजनाको मृत्यु, सबैको पहिचान खुल्यो

जनकपुर- होलीमा अत्यधिक मदिरा पिउँदा धनुषामा पाँच जनाको मृत्यु भएको छ ।

धनुषाको क्षिरेश्वरनाथ नगरपालिका वडा नम्बर २ स्थित रमदैयामा अत्यधिक घरेलु मदिरा खाएर बिरामी परेका आठ जनामध्ये पाँच जनाको मृत्यु भएको वडाध्यक्ष श्याम यादवले जानकारी दिए ।

उनका अनुसार बिहीबार बिहान एक जनाको, दिउँसो दुई जनाको र बिहीबार राति दुई जनाको मृत्यु भएको हाे ।

अत्यधिक घरेलु मदिरा खाएर ज्यान गुमाउनेहरुमा करिब ३० वर्षीय रामनारायण महरा, करिब ३२ वर्षीय राजु महरा, करिब ४० वर्षीय रामविलास मण्डल, करिब ३० वर्षीय ब्रह्मदेव यादव र करिब ६५ वर्षीय गुद्री महरा रहेको वडाध्यक्ष यादवले जानकारी दिए ।

उनका अनुसार रामनारायण महरा र राजु महराको बिहीबार राति मृत्यु भएको हो । उनीहरु एक नम्बर वडाका हुन् । अन्य तीन जना दुई नम्बर वडाका हुन् भने उनीहरुको बिहीबार दिउँसो मृत्यु भएको हो ।

धनुषामा बुधबार होली मनाइएको थियो। होलीमा अत्याधिक मदिरा पिएका उनीहरु बुधबार राति नै बेहोस भएका थिए । बेहोस भएका आठ जनामध्ये पाँच जनाको मृत्यु भएको र तीन जनाको सिकिस्त अवस्थामा उपचार भइराखेको वडाध्यक्ष यादवले जानकारी दिए ।

सिकिस्त बिरामी हुनेहरुमा शत्रुधन मण्डल, सीताराम यादव, इन्द्रजित महरा रहेका छन्। इन्द्रजितलाई थप उपचारका लागि धरान पठाइएको प्रहरीले जनाएको छ ।