भारतले रोक्यो सबैखाले भिसा, भारतीय नागरिक पनि स्वदेश फर्किन नपाउने

कोरोना भाइरस (कोभिड–१९) को संक्रमण बढ्न थालेपछि भारतले आफ्नो मुलुकमा यात्रा गर्न प्रतिबन्ध लगाएको छ। बीबीसीका अनुसार भारतले आगामी अप्रिल १५ सम्मको लागि सबैखाले भिसा रद्द गरेको हो।

भारतका स्वास्थ्य मन्त्री हर्षवर्धनले कोरोनाको फैलावट रोक्न सरकार आफ्नो पूरै क्षमताका साथ लागिपरेको बताएका छन्। जनसंख्याको हिसाबले भारतको विश्वको दोस्रो ठूलो देश हो।

अन्य देशले विदेशीहरुको प्रवेशमाथि मात्र रोक लगाइरहेको समयमा भारतले भने विदेशबाट भारत आउन खोज्ने आफ्नै नागरिकलाई पनि प्रवेश नदिने घोषणा गरेको छ।

बुधबार शीर्ष मन्त्रीहरुको एक समूहको बैठकपछि उक्त ‘यात्रा निर्देशिका’ जारी गरिएको थियो। भारतले जारी गरेको यात्रा निर्देशिकाअनुसार भारत सरकारले अब मार्च १३ को दिउँसो १२ बजेपछि भारतका लागि हिँडिसकेका विदेशीलाई समेत प्रवेश दिने छैन।

प्रतिबन्ध विदेशमा रहेका भारतीय नागरिकताधारीलाई पनि लागू हुने भए पनि कूटनीतिक नियोगमा काम गर्ने कर्मचारीलाई भने छुट गरिएको छ ।

निर्देशिकामा भारतमा आउनैपर्ने अत्यावश्यक कारण भएका विदेशीले तिनको नजिकको भारतीय दूतावास वा वाणिज्य दूतावाससँग सरसल्लाह गर्न सुझाव दिइएको छ। साथै भारतले आफ्ना नागरिकलाई युरोप र अमेरिकाको भ्रमण नगर्न निर्देशन दिएको छ।

भारतको नयाँ यात्रा निर्देशिका विश्व स्थास्थ्य संगठनले कोरोना भाइरस प्रकोपलाई ‘विश्वव्यापी महामारी’ घोषणा गरेपछि आएको हो।

बीबीसी