जर्मनीका ७० प्रतिशत मानिसमा कोरोना संक्रमण हुन सक्छ : मर्केल

एजेन्सी- जर्मन चान्सलर एन्जेला मर्केलले जर्मनीका ६० देखि ७० प्रतिशत मानिसमा कोरोना भाइरसको संक्रमण हुन सक्ने चेतावनी दिएकी छन्।

उनले विज्ञहरुलाई उदृत गर्दै यस्तो चेतावनी दिएकी हुन्।

मर्केलले अहिलेसम्म कोरोना भाइरसबारे सबैतिर अध्ययन भइनसकेको, औषधि पत्ता नलागेको र यसमा सरकारले पनि चासो दिन नसकेको समेत बताएकी छन्।

अमेरिका र युरोपमा तीब्र रुपमा बढ्दै

कोरोना भाइरसको संक्रमण अमेरिका र युरोपेली देशहरुमा तीब्र रुपमा फैलिएको छ।

अमेरिकामा संक्रमितको संख्या १ हजार नाघेको छ भने मृत्यु हुनेको संख ३१ पुगेको छ।

युरोपका अधिकांश देशमा फैलिएको कोरोनाबाट इटलीमा दश हजार बढी संक्रमित भएका छन्। त्यहाँ ६ सय ३१ जनाको मृत्यु भइसकेको छ।

स्पेन, फ्रान्स, जर्मनीलगायतका मुलुकमा यसको संक्रमण फैलिएको छ।

यसैबीच अमेरिकाले इरानी जेलमा रहेका आफ्ना नगरिकलाई रिहा गर्न आग्रह गरेको छ।

इरानमा कोरोना भाइरसको संक्रमण तीब्र रुपमा फैलिएपछि अमेरिकाले इरानलाई आफ्ना नागरिकलाई जेलबाट रिहा गर्न आग्रह गरेको हो।