भारतमा होली उत्सवपछि नुहाउन गएका १५ जनाको डुबेर मृत्यु

काठमाडौं- भारतको ओडिसामा होली उत्सव मनाएपछि रंग पखाल्न गएका १५ जनाको डुबेर मृत्यु भएको छ।

होली मनाएर आफ्ना साथीसँग विभिन्न नदी तथा पोखरीमा नुहाउन गएका १५ जनाको शव डुबेको अवस्थामा भेटिएको सुरक्षा अधिकारीलाई उधृत गर्दै बीबीसीले जनाएको छ।

अहिलेसम्म प्राप्त सूचनाअनुसार कटकमा तीन, भुवनेश्वरस्थित रंगबजार केनालमा एक, नियाली गाउँमा एक, परलाखेमुण्डीको महेन्द्रतनया नदीमा एक, रेढ़ाखोलको सुन्धीमुँडा केनालमा एक व्यक्तिको मृत्यु डुबेर भएको छ।

यस्तै नीलगिरिको सीएडीमलमा एक, सालेपुरको चित्रोत्पला नदीमा एक तथा बारीपदाको जम्भीरामा एक व्यक्तिको डुबेर मृत्यु भएको छ।
यसका साथै नबरंगपुरको इन्द्रावती नदीमा एक व्यक्तिको शव भेटिएको छ। जसको पहिचान भएको छैन।

विगतका वर्षमा पनि होलीका बेला मादक पदार्थ खाएर नुहाउने क्रममा मृत्युका घटना हुने गरेकाले स्थानीय प्रशासनले नदीमा जान प्रतिबन्ध लगाएको थियो।

तर प्रशासनको प्रतिबन्धलाई बेवास्ता गरेर नदीमा नुहाउन जाँदा दुःखद घटना भएको सुरक्षा अधिकारीहरुले बताएका छन् ।