प्रहरी हवल्दारमाथि बलात्कारको आरोप

भैरहवा - कपिलबस्तुमा एक महिलामाथि प्रहरीले बलात्कार प्रयास गरेको आरोप लागेको छ।

प्रहरी चौकी लबनीमा कार्यरत हवल्दार हेमन्त बहादुर कुमालले एक महिलामाथि बलत्कार प्रयास गरेको भन्दै स्थानीयले प्रहरी चौकी घेरेका छन्। सडकमा माग्दै हिड्ने ती महिला राति स्थानीय बगैचामा सुतिरहेकाबेला ड्युटीमा खटिएका प्रहरी हवल्दार कुमालले जबरजस्ती गरेको आरोप महिलाले लगाएकी छिन्।

स्थानीयका अनुसार ती महिला भारतीय नागरिक रहेकी बुझिएको छ। आरोप प्रमाणित भए हवल्दारमाथि ऐन नियमअनुसार कारबाही हुने जिल्ला प्रहरी कार्यालयका प्रहरी नायव उपरीक्षक सुनिल मल्लले बताए।

यसैगरी रुपन्देहीको कोटहिमाई गाउँपालिकामा पनि २३ वर्षीय अनिल यादवलाई १३ वर्षीय बालिकालाई जबरजस्ती गरेको अभियोगमा प्रहरीले नियन्त्रणमा लिएको छ। प्रहरी निरीक्षक चित्र घलेका अनुसार ती युवाले बालिकालाई जबरजस्ती गरेपछि गाउँलेले पक्राउगरी प्रहरीलाई बुझाएका हुन्। यादव र बालिकाको स्वास्थ्य जाँचका लागि भिम अस्पताल भैरहवा पठाइएको छ।