वुहान पुगेर बिरामी भेटे चिनियाँ राष्ट्रपति सीले

काठमाडौं– चिनियाँ राष्ट्रपति सी जिनपिङले  कोरोनाभाइरस (कोभिड–१९) संक्रमण फेला परेको स्थान वुहानमा पुगेर बिरामीसँग भेट गरेका छन्। राष्ट्रपति सी मंगलबार पहिलोपटक काेराेनाबाट अत्यन्त प्रभावित क्षेत्र वहुान पुगेका हुन्।

उनले त्यहाँ बिरामी, स्वास्थ्यकर्मी, सुरक्षा निकाय प्रमुख, स्वास्थ्य स्वयंसेवक र सर्वसाधारणसँग भेट गरी बिरामीको अवस्था र उपचार प्रक्रियाबारे जानकारी लिएको चाइना डेलीले जनाएको छ।

राष्ट्रपति सीले त्यहाँका उच्च अधिकारीलाई कोरोना भाइरस नियन्त्रण र उपचारका सम्बन्धमा निर्देशन दिने कार्यक्रम रहेको समाचारमा जनाइएको छ।

यसैबीच चीनमा कोरोना नियन्त्रण उन्मुख रहेकाे साउथ चाइना मर्निङ पोस्टले उल्लेख गरेकाे छ।

कोरोनाका कारण सोमबार १७ जनाको मृत्यु भएको छ भने १९ जना नयाँ संक्रमित फेला परेका छन्। हालसम्म चीनमा तीन हजार १३६ जनाको ज्यान गएको छ।

पछिल्लो तथ्यांकअनुसार विश्वभर एक लाख १३ हजार ३५८ जनामा कोरोना संक्रमण फेला परेको छ भने चार हजार ९ जनाको ज्यान गएको छ। ६३ हजार ९१३ जना उपचारपछि घर फर्किएका छन् ।