सुरक्षाको अनुभूति गराउन प्रहरीले सक्रियता बढाउनुर्छ : आइजीपी ज्ञवाली

काठमाडौं- प्रहरी महानिरीक्षक ठाकुर प्रसाद ज्ञवालीले नागरिकलाई सुरक्षाको अनुभूति गराउन प्रहरी अझैँ बढी संवेदनशिल हुनुपर्ने बताएका छन्।

महानगरीय प्रहरी कार्यालय रानीपोखरी तथा मातहतका प्रहरी अधिकृतहरुलाई आइतबार निर्देशन दिँदै ज्ञावालीले नागरिकलाई सुरक्षाको अनुभूति गराउन प्रहरी अझैँ सक्रिय रुपमा प्रस्तुत हुनुपर्ने बताए।

मातहतका कर्मचारीहरुको मनोबल उच्च बनाई उत्कृष्ट व्यवहार, क्रियाकलाप, व्यवसायिक दक्षता तथा सिपका साथ कार्य सम्पादन गर्नतर्फ अग्रसर हुन उनले निर्देशन दिए।

‘संगठनले लिएको लक्ष्य र उद्देश्य अनुरुप सुरक्षा व्यवस्थालाई अझ सुदृढ गर्दै सबै प्रहरी कर्मचारीहरु आफ्नो दायित्व पुरा गर्न केन्द्रित हुनुपर्यो’ महानिरीक्षक ज्ञवालीले भने, ‘हुण्डी, कालाबजारी, चोरी निकासीलगायत अन्य अपराधिक गतिविधि नियन्त्रणमा लिन प्रहरी थप सक्रिए हुन जरुरी छ।’

सबै प्रहरी कर्मचारीले सकारात्मक सोच एवम् उत्कृष्ट व्यवहार र आचरणका साथ नागरिक केन्द्रित सेवा प्रदान गर्नुपर्नेमा ज्ञावालीले जोड दिए।

उपत्यकाको ट्राफिक व्यवस्थापनमा देखिएको चुनौति समाधानका लागि त्यसमा संलग्न सबै सरोकारवाला निकायसँग समन्वय र सहकार्य गर्दै अगाडि बढ्न ज्ञवालीले निर्देशन दिए।