मास्कमा कालोबजारी गर्ने नेपाल केयर सर्जिकललाई २ लाख जरिवाना

काठमाडौं- वाणिज्य, आपूर्ति तथा उपभोक्ता संरक्षण विभागले मास्कमा कालोबजारी गर्ने एक सर्जिकल सप्लायर्सलाई २ लाख रुपैयाँ जरिवाना गरेको छ।

बुधबार अनुगमनमा निस्किएको विभागको टोलीले क्षेत्रपाटीमा रहेको नेपाल केयर सर्जिकल सप्लायर्सलाई कालोबजारी गर्ने उद्देश्यले मास्क लुकाएको भन्दै २ लाख रुपैयाँ जरिवाना गरेको हो।

कोरोना भाइरसको त्रास बढिरहेका बेला मेडिकल पसलहरुले कालोबजार सुरु गरेको भन्ने गुनासोपछि विभागले अनुगमन गरेको थियो।

सर्जिकल मास्क, सेनिटाइजर जस्ता वस्तुको माग बजारमा ह्वात्तै बढेका बेला यस्ता पसलहरुले कालोबजारी सुरु गरेका छन्।

पर्याप्त मात्रामा रहेको सेनिटाइजर जस्तो वस्तुलाई अभाव देखाउँदै केही दिनदेखि बिक्रि वितरण नै रोकेका छन्।

त्यस्तै बजारमा ५–१० रुपैयाँमा प्राप्त हुने सर्जिकल मास्क तथा रु. २५० मूल्य पर्ने एन–९५ मास्कको पनि अभाव देखाउँदै महंगो मूल्यमा विक्रि गर्दै आएको पाइएको छ।

यस्ता वस्तुको कालो बजारी बढेपछि विभागले अब अनुगमनलाई निरन्तरता दिने भएको हो।

पछिल्ला केही दिनयता विश्वका ७० भन्दा बढी देशमा फैलिईसकेको कोरोना भाइरसको संक्रमण नेपालमा पनि फैलिने हो कि भन्ने त्रास बढेको छ।

साथै भौगोलिक हिसाबले र सुरक्षाका लागि आवश्यक तयारी नगरिँदा जोखिम झनै बढेको बताइएको छ।