चीर ठड्याइएसँगै सुरु भयो होली, २६ र २७ गते बिदा

काठमाडौं- रंगहरुको पर्व होली औपचारिक रुपमा सुरु भएको छ । मंगलबार (आज) काठमाडौंको हनुमानढोकास्थित बसन्तपुरमा चीर ठड्याएसँगै होली सुरु भएको हो ।

बिहान ७ बजेर ५७ मिनेटको साइतमा बसन्तपुरस्थित हनुमानढोका दरबारको दक्षिण पटाङगिनी, ऐतिहासिक मोहनकाजी चोक तथा दाखचोकमा ३२ फुट उचाइको रंगीविरङगी होली चीर ठड्याइएको छ।

चीर ठड्याएसँगै काठमाडौंलगायत देशभर औपचारिक रुपमा होली पर्व सुरु भएको मानिन्छ । होली पर्वको शुभारम्भ भएको जनाऊ दिन बसन्तपुरमा चीर ठड्याउने गरिएको पौराणिक मान्यता रहेको छ ।

होली पर्वलाई बसन्त ऋृतिको आगमनको खुसीयालीमा रंगसहित मनाउने पर्वको रुपमा लिने गरिएको छ ।

फागुन शुक्ल अष्टमीदेखि फागुन शुक्ल पूणिर्मासम्म होली पर्व मनाउने गरिन्छ ।

होली मनाउँन संघीय सरकारले काठमाडौंलगायत पहाडी जिल्लाहरुमा फागुन २६ गते सोमबार र तराई मधेसका जिल्लाहरुमा २७ गते मंगलबार होली पर्वको सार्वजनिक विदा दिएको छ ।

होलीको अवसरमा प्रदेश २ मा भने दुई दिन सार्वजनिक बिदा दिइने भएको छ । फागुन २७ र २८ गते सार्वजनिक बिदा दिने निर्णय भएको प्रदेश सरकारका प्रवक्ता एवं आन्तरिक मामिला तथा कानुनमन्त्री ज्ञानेन्द्र यादवले जानकारी दिएका छन् ।