मुद्दा प्रकरणमा मुख्यमन्त्री राईकाे स्पष्टाेक्ति, मलाई गिराेहले खेदे

इटहरी– प्रदेश १ का मुख्यमन्त्री शेरधन राईले आफूलाई विगत चार वर्षदेखि गिराहको आक्रमण परेको दाबी गरेका छन्।

उनलाई पति दाबी गर्दै मुद्दा दायर गर्ने बालिका खड्का प्रकरणमा मुख्यमन्त्री राईले यस्तो अभिव्यक्ति दिएका हुन्।

यसअगाडि यौन हिंसाको आरोप लाएकी खड्काका विषयमा सदनमा विपक्षीले आवाज उठाउँदा पनि राई मौन रहँदै आएका थिए।

इटहरीमा शनिबार आयोजित प्रेस संगठनको भेलामा मुख्यमन्त्री राईले खड्काको नाम नलिई चार वर्षदेखि खेदेको बताएका हुन्।

आफू संघीय सञ्चारमन्त्री बनेको तीन महिनापछि ६ वटा मोबाइलबाट धम्कीपूर्ण रुपमा सयौं म्यासेज आएको जानकारी उनले दिए।

आफूले सबै म्यासेज प्रिन्ट गरेर तत्कालीन नेकपा एमालेको पोलिटब्युरोमा पेस गरेको पनि उनले बताए।

मुख्यमन्त्री राईले आफूलाई मौसमअनुसार आक्रमण गर्न पार्टीमै आबद्ध गिरोह सक्रिय भएको बताए। उनले भने, ‘अबचाहिँ अदालतमा मुद्दा गएकाले दूधको दूध, पानीको पानी छुट्टिनेछ।’