५१ देशमा कोरोना संक्रमण, मर्नेको संख्या दुई हजार आठ सय नाघ्यो

बेइजिङ– गत डिसेम्बरमा चीनको हुबेई प्रान्तमा पहिलो पटक देखिएको कोरोना भाइरस (कोभिड–१९)को संक्रमण ५१ देशमा फैलिसकेको छ।

अन्तर्राष्ट्रिय समाचार संस्था सीएनएनका अनुसार सात देशमा कोरोना संक्रमण भेटिएसँगै यसबाट प्रभावित देशको संख्या ५१ पुगेको हो।

कोरोना संक्रमणबाट मृत्यु हुनेको संख्या भने दुई हजार आठ सय नाघेको छ। सीएनएनका अनुसार चीनमा यस भाइरसको संक्रमणबाट दुई हजार सात सय ४४ र अन्य देशमा ६४ गरी कूल मर्नेको संख्या दुई हजार आठ सय आठ पुगेको छ।

सीएनएनका अनुसार शुक्रबार बिहान ३ बजेसम्म कोरोनाबाट संक्रमितको संख्या ८२ हजारभन्दा बढी पुगेको छ, जसमध्ये चीनमा ७८ हजार चार सय ९७ छन्।

चीनबाहिर सबैभन्दा बढी दक्षिण कोरियामा संक्रमित छन्। सीएनएनका अनुसार दक्षिण कोरियामा शुक्रबार बिहानसम्म संक्रमितको संख्या दुई हजार २२ पुगेको छ।

यसैबीच, कोरोना संक्रमण विश्वव्यापीरूपमा फैलिन थालेपछि विश्व स्वास्थ्य संगठनका प्रमुख टेड्रोस अधानोमले चीन नभएर बाँकी विश्व ‘सबैभन्दा ठूलो चिन्ता’को विषय भएको बताएका छन्।