विवाह गर्न नमान्दा एसिड प्रहार गर्नेलाई आठ वर्ष कैद

मकवानपुर– जिल्ला अदालत, मकवानपुरले हेटौंडाकी एक युवतीमाथि तेजाब प्रहार गर्ने भारतीय नागरिकलाई आठ वर्ष कैद र एक लाख रूपैयाँ जरिवाना गर्ने फैसला गरेको छ।

जिल्ला न्यायाधीश कमलराज विष्टको इजलासले बिहीबारे हेटौंडाकी बिन्दवासिनी कंशकारमाथि तेजाब प्रहार गर्ने भारतीय नागरिक दिलीपराज केशरीलाई उक्त फैसला सुनाएको हो।

अदालतले पीडित कंशाकारको उपचारमा खर्च भएको एक करोड १४ लाख ८५ रूपैयाँसमेत पीडकबाट भराउन तथा पीडकबाट सम्भव नभए राज्यको कोषबाट भए पनि उपलब्ध गराउन आदेशसमेत दिएको छ।

अदालतले कंशाकारमाथि तेजाब प्रहार गर्ने केशरीलाई भगाउन सहयोगी भूमिका निर्वाह गरेको भन्दै हेटौंडाका सञ्जय मण्डललाई साढे दुई वर्ष कैद सजायसहित ४० हजार रूपैयाँ जरिवाना गर्ने निर्णयसमेत गरेको छ।

विवाहको प्रस्ताव अस्वीकार गरेको भन्दै केशरीले कंशाकारमाथि २०७० वैशाख ९ गते पसलमा बसिरहेको समयमा तेजाब प्रहार गरेका थिए।

तेजाब प्रहारपछि मण्डलको मोटरसाइकल चढेर भागेका केशरी ६ वर्षपछि भारतबाटै पक्राउ परेका थिए। तेजाब आक्रमणपछि कंशाकारले नेपाल तथा भारतका विभिन्न अस्पतालमा उपचार गराइरहेकी छन्।