धुम्मिएको आकाश कहिले खुल्छ ? यस्तो हुनेछ शुक्रबारसम्मको मौसम

काठमाडौं- पश्चिमी वायु र न्यून चापीय प्रणालीका कारण धुम्मिएको आकाश भोलि (बिहीबार)बाट खुल्ने भएको छ ।

मौसम पूर्वानुमान महाशाखाका अनुसार आज (बुधबार) देशभर धुम्मिएको आकाश भोलिबाट क्रमशः खुल्दै जानेछ । आज देशका मध्य तथा पूर्वी भू–भाग साथै पश्चिमी पहाडी भू–भागका केही स्थानहरुमा मेघ गर्जन र चट्याङ सहित वर्षाको सम्भावना रहेको छ ।

उच्च पहाडी तथा हिमाली भू-भागका थोरै स्थानहरुमा हल्का हिमपातको सम्भावना रहेको वरिष्ठ मौसमविद् निराजन सापकोटाले नेपाल समयलाई जानकारी दिए ।

उनका अनुसार आज देशका विभिन्न स्थानमा हल्कादेखि मध्यम वर्षा हुने र भोलिबाट मौसम सफा हुँदै जानेछ । शनिबारबाट भने पुनः मौसम बदली भइ आकाश धुम्मिने र वर्षा हुने सम्भावना रहेको उनले बताए ।

उनले भने- 'आज दिउँसो एकैछिन आकाश खुले पनि अपरान्हबाट पुनः बादल लागेर मौसम धुम्मिने छ । साँझ वर्षा भएसँगै क्रमशः मौसम सफा हुने देखिएको छ ।' बिहीबार र शुक्रबार मौसम सफा हुनेछ भने शनिबार र आइतबार पुनः मौसम बदलिने उनले जानकारी दिए ।

वरिष्ठ मौसमविद् सापकोटाका अनुसार अहिले पश्चिमी क्षेत्रमा हल्का वर्षा भइराखेको छ । दिउँसोपछि काठमाडौं उपत्यकासहित मध्य र पूर्वी क्षेत्रमा पनि वर्षा हुनेछ । केही पहाडी क्षेत्रमा भने चट्याङसहित मध्यम वर्षाको सम्भावना रहेको उनले जानकारी दिए ।

यस्ताे हुनेछ आगामी तीन दिनको मौसम

फागुन १४ गते (बुधबार)

दिउँसो देशको पूर्वी भू-भागमा सामान्यदेखि पूर्ण बदली रही मध्य र पश्चिमी भू-भागमा आंशिकदेखि सामान्य बदली रहनेछ।

देशको पूर्वी भू-भागका केही स्थानहरूमा र मध्य र पश्चिमी भू-भागका पहाडी भेगका थोरै स्थानहरुमा मेघ गर्जन/चट्याङ सहित वर्षाको सम्भावना रहेको छ ।

राति देशको मध्य भू-भागमा सामान्य बदली रही बाँकी भू-भागमा आंशिक बदली रहनेछ। मध्य र पश्चिमी तराईका एक-दुई स्थानहरुमा मेघ गर्जन/ चट्याङ सहित वर्षाको सम्भावना रहेको छ ।

फागुन १५ गते (बिहिबार)

दिउँसो देशको पश्चिमी भू-भागमा सामान्य बदली रही बाँकी भू-भागमा मौसम सामान्यतया सफा रहनेछ।

राति देशको मध्य र पश्चिमी भेगमा आंशिक बदली रहनेछ र बाँकी भू-भागमा मौसम सामान्यतया सफा रहनेछ।

फागुन १६ गते (शुक्रबार)

दिउँसो देशको पहाडी भेगमा आंशिक बदली रही बाँकी भू-भागमा मौसम सामान्यतया सफा रहनेछ।

राति देशको पश्चिमी भू-भागमा सामान्यदेखि पूर्ण बदली रही मध्य र पूर्वी भू-भागमा आंशिक बदली रहनेछ।