दिल्ली दंगामा मृत्यु हुनेको संख्या १३ पुग्यो

नयाँ दिल्ली– भारतको केन्द्रीय राजधानी नयाँ दिल्लीमा नागरिकतासम्बन्धी कानुनको पक्ष–विपक्षमा उत्रिएका प्रदर्शनकारीबीच भड्किएको दंगाबाट मृत्यु हुनेको संख्या १३ पुगेको छ।

अन्तर्राष्ट्रिय समाचार संस्था बीबीसीका अनुसार भारतका केन्द्रीय स्वास्थ्यमन्त्री हर्षवर्धनले दंगामा १३ जनाको मृत्यु भएको पुष्टि गरेका छन्। उनका अनुसार दंगामा १५० घाइते भएकोमा ३०–४० जना उपचारपछि घर फर्किएका छन्। घाइतेमध्ये केहीको अवस्था गम्भीर रहेको उनको भनाइ छ।

नागरिकतासम्बन्धी कानुनको पक्ष र विपक्षमा आइतबारदेखि दिल्लीका विभिन्न ठाउँमा प्रदर्शन भइरहेको छ। प्रदर्शनकारी भाला र लाठी लिएर उत्रिएपछि प्रदर्शन हिंसात्मक बनेको छ। कतिपय ठाउँमा पसल, घर तथा सवारी साधनहरू जलाइएका छन्।

दंगाले साम्प्रदायिक स्वरूप लिन थालेपछि चिन्ता बढ्दो छ। हिंसा र आगजनी बढ्दै गएपछि केन्द्रीय गृहमन्त्रीले शान्तिको अपिलसमेत गरेका छन्।

भारतको संसदले नागरिकता संशोधन ऐन (सीएए) पारित गरेदेखि नै त्यसको विरोधमा प्रदर्शन भइरहेका छन्।