काठमाडौंको बाफलमा श्रीमती र सालीमाथि एसिड प्रहार

काठमाडौं- काठमाडौंको बाफलमा एक व्यक्तिले श्रीमती र सालीमाथि एसिड प्रहार गरेका छन् ।

रक्सीले मात्तिएका २९ वर्षीय शिव रम्तेलले राति श्रीमती सुनिता रम्तेल र १५ वर्षीय सालीमाथि एसिड प्रहार गरेका हुन् ।

रम्तेल आइतबार रक्सी पिएर कोठमा आएका थिए । राति अबेर आएका उनले श्रीमतीसँग भनाभन भएपछि ट्वाइलेटमा रहेको एसिड ल्याएर छ्यापेका प्रहरीले जनाएको छ ।

उनलाई रोक्ने क्रममा सालीको आँखा र शरीरमा एसिड परेको छ । ट्वाइलेट सफा गर्न राखिएको कमसल एसिड भएका कारण उनीहरुको कपडा जले पनि शरीरमा ठूलो क्षति नभएको महानगरीय प्रहरी वृत कालीमाटीका डीएसपी रुगम कुँवरले जानजकारी दिए ।

उनका अनुसार चर्को स्वरमा झगडा भएको खबर टोल फ्री नम्बर एक सयमा आएलगतै प्रहरीले रम्तेललाई कोठाबाटै पक्राउ गरेको थियो ।

कोठाभित्र पुग्दा सुनिताको कपडा एसिडले जलेको थियो । प्रहरीले दुवैलाई तत्काल कंलकीस्थित एक अस्पतालमा पुर्याएको थियो ।

छालामा धेरै क्षति नभएको र सालीको आँखामा एसिडको छिटा परेका कारण अस्पतालले उनीहरुलाई घर पठाइदियो ।

गोरखा घर भएका रम्तेल रङ लगाउने काम गर्दै आएका थिए ।