देउवाको गृहजिल्लामा उम्मेदवारदेखि मतदातासम्म केन्द्रबाटै 'फिक्स'

डडेल्धुरा- नेपाली कांग्रेसको क्रियाशील सदस्यता वितरणमा प्रधानमन्त्रीसमेत रहेका पार्टी सभापति शेरबहादुर देउवाले गृहजिल्ला डडेल्धुरामा अनावश्यक हस्तक्षेप गरेपछि सातौं जिल्ला अधिवेशन हुनेमा अन्योलता थपिएको छ। 

आइतबार राती नेपाली कांग्रेस डडेल्धुराको क्रियाशील सदस्यताको विवरण नेपाली कांग्रेसको आधिकारिक वेबसाइटबाट सार्वजनिक भएसँगै प्रधानमन्त्री देउवाको गृहजिल्लामा तीव्र असन्तुष्टि देखिएको छ। मुलुककै सबैभन्दा जेठो लोकतान्त्रिक दल मानिने कांग्रेसमा विधि र पद्धतीगत ढंगबाट क्रियाशील सदस्यता वितरण हुनुपर्नेमा अनावश्यक हस्तक्षेप भएको भन्दै जिल्लास्तरीय नेता कार्यकर्ताहरुले तीव्र असन्तुष्टि व्यक्त गरेका हुन्।

कांग्रेस सभापति तथा प्रधानमन्त्री देउवाले गृहजिल्ला डडेल्धुरामा अघि सारेका जिल्ला सभापतिका उम्मेदवार भीमबहादुर साँउदलाई जिताउने अभिप्रायले वडा, पालिका, प्रदेश सभा क्षेत्र र जिल्ला कार्यसमिति गरेर चार तहबाट विधिवत रुपमा पारित गरेर पठाएका क्रियाशील सदस्यहरुमा थपघट गरेर अन्तिम मतदाता नामावली सार्वजनिक गरिएको नेपाली कांग्रेस डडेल्धुराका उपसभापति करुणाकर भट्टले बताए। उनले जिल्ला नेतृत्वका लागि उम्मेदवारदेखि मतदातासम्म केन्द्रबाटै पठाइएकाले अन्योलता उत्पन्‍न भएको जिकिर गरे।

सातवटै स्थानीय तहका ५२ वडामा सभापति पदका आकांक्षी साँउदको पक्षमा प्रतिनिधी आउने गरि क्रियाशील सदस्यतामा थपघट गरिएको उपसभापति भट्टको आरोप छ। उनले भने, 'प्रक्रियागत ढंगले पठाइएका क्रियाशील सदस्यहरुको नविकरण गरिएको छैन भने नयाँ सदस्यताका लागि पठाइएको नामावलीसमेत फेरबदल छ। यो कुनै एक व्यक्तिलाई जिताउने उद्देश्यले सबै गरिएको देखिन्छ।'

नेपाली कांग्रेस डडेल्धुराका कार्यालय सचिव राम विष्टका अनुसार जिल्ला कार्यसमितिले प्रक्रिया पुगाएर दुई हजार पाँच सय छ जना नयाँ क्रियाशील सदस्य तथा नविकरणका लागि पुराना सदस्यको नाम समावेश गरेर कुल पाँच हजार आठ सय चार जनाको नामावली सिफारिस गरेको थियो। जसमध्ये चार सय ६० जनाको नाम छानबिन समितिले हटाएर पठाएको छ भने कुनै पनि प्रक्रिया नपुगाइएका तीन सय १२ जनाको नाम केन्द्रबाटै थपेर पठाइएको छ। 

प्रधानमन्त्री तथा पार्टी सभापति शेरबहादुर देउवाको वडा गन्यापधुरा गाउँपालिका–१ मा १६ जना क्रियाशील सदस्यको नाम हटाएर देउवापुत्र जयबिरसिंह देउवासहित १० जनाको नाम थपेर मतदाता नामावली सार्वजनिक गरिएको छ। अन्य स्थानमा हटाइका क्रियाशील सदस्यहरुमा नेपाली कांग्रेस डडेल्धुराका सभापति कर्णबहादुर मल्लकी आमा पार्वतीदेवी मल्ल, जिल्ला कार्यसमिति सदस्य कमला विष्ट, अमरगढी नगरपालिका–९ का सभापति नरबहादुर पाल र कार्यालय सचिव राम विष्टलगायतका छन्।

 विभिन्न पार्टीबाट नेपाली कांग्रेस प्रवेश गरेका व्यक्तिहरुको समायोजनका लागि गठित जिल्लास्तरीय कार्यदलका सदस्य रामबहादुर ऐरको नाम पनि क्रियाशील सदस्यबाट हटाइएको छ। ऐरले सिफारिस गरेका सबै क्रियाशील सदस्यको नामावली छैन। तीन हजार एक सय ४४ नयाँ र दुई हजार पाँच सय ९८ पुराना गरेर गरेर केन्द्रबाट पाँच हजार सात सय ४२ जनाको नाम क्रियाशील नामावलीमा सार्वजनिक भएको छ।

 डडेल्धुरामा पार्टी सभापति देउवाकै दुई उपगुट क्रियाशील छन्। १४औँ महाधिवेशनमा जिल्ला सभापतिका लागि सभापति देउवाको 'ग्रीन सिग्‍नलसहित पार्टीका पूर्व सभापति रघुवर भट्टले नेतृत्व गरिरहेको एउटा गुटको तर्फबाट परशुराम नगरपालिकाका मेयर साउँदलाई अघि सारिएको छ भने जिल्ला सभापति मल्ल समूहका तर्फबाट करुणाकर भट्ट र हरिप्रसाद भट्टले जिल्ला सभापतिका आकंक्षी छन्।

 क्रियाशील सदस्यतामा उत्पन्‍न विवादका सन्दर्भमा नेपाली कांग्रेस डडेल्धुराले मंगलबार जिल्ला कार्यसमितिको बैठक बोलाइएको र बैठकले गर्ने निर्णयानुसार अघि बढने जिल्ला सभापति मल्लले जानकारी दिए। उनले क्रियाशील सदस्यता वितरणमा भएको अन्यायका कारण तीव्र असन्तुष्टि रहेकाले सातौं जिल्ला अधिवेशन सुनिश्चित हुन नसकेको बताए।

 पार्टीको क्रियाशील सदस्यको सूचीबाट अनावश्यक रुपमा हटाइएका क्रियाशील सदस्यहरुले भने कारण बिना मतदाता नामावलीमा नाम समावेश नभएको भन्दै आक्रोश व्यक्त गरेका छन्। स्थानीय निर्वाचनका बेला बागी उम्मेदवार भएर पार्टीको कारबाहीमा परेका व्यक्तिहरुको क्रियाशील सदस्यता मतदाता नामावलीमा समावेश गरिएको तर आधिकारिक उम्मेदवारको नाम काटिएको नेपाली कांग्रेस डडेल्धुराका सदस्य सन्तोष खडकाले बताए। यस्तो अन्यायपूर्ण क्रियाकलापका कारण जिल्ला अधिवेशन अनिश्चित बनेको उनले जानकारी दिए।