अर्थमन्त्री खतिवडाकाे ठाउँमा वामदेवलाई सांसद बनाइने

काठमाडौं- डेढ वर्षको कसरतपछि नेकपा नेता वामदेव गौतम ‘मनोनीत सांसद’का रूपमा संसद प्रवेश गर्न तयार भएका छन् । उनी युवराज खतिवडालाई प्रतिस्थापन गर्दै राष्ट्रिय सभामा प्रवेश गर्न सहमत भएका हुन् ।

अर्थमन्त्री खतिवडाको कार्यकाल यही २० फागुनमा सकिँदै छ । नेकपाको शनिबार बसेको सचिवालय बैठकमा मन्त्रिपरिषद्को सिफारिसमा राष्ट्रपतिबाट मनोनीत हुने राष्ट्रिय सभाको सिटमा गौतमलाई लैजाने समझदारी बनेको हो ।

‘वामदेव गौतम कमरेडलाई राष्ट्रिय सभामा लैजाने सहमति बनेको छ । औपचारिक निर्णय हुन बाँकी छ । कानुनी प्रक्रिया पूरा गरेपछि औपचारिक निर्णय हुन्छ,’ नेकपा सचिवालयका एक सदस्यले बताए ।

यसअघि नेता गौतमले राष्ट्रिय सभा सदस्यसमेत प्रधानमन्त्री बन्ने गरी संविधान संशोधन नभएसम्म सांसद नबन्ने सर्त राख्दै आएका थिए । प्रतिनिधिसभा सदस्य मात्र प्रधानमन्त्री बन्न सक्ने संवैधानिक व्यवस्था छ ।

नेकपा उच्च स्रोतका अनुसार अनुकूल परिस्थितिमा संविधान संशोधन गर्ने प्रधानमन्त्री ओली र पार्टी अध्यक्ष प्रचण्डसहितका शीर्ष नेताको आश्वासनपछि गौतमले आफ्नो पुरानो अडान छाडेका हुन् ।

प्रधानमन्त्री केपी ओली र नेकपा अध्यक्ष प्रचण्डले राष्ट्रपति विद्यादेवी भण्डारीलाई समेत भेटेर पार्टी सहमतिको जानकारी गराइसकेका छन् । शनिबार सचिवालय बैठकलगत्तै पहिला प्रचण्ड र त्यसपछि प्रधानमन्त्री ओली शीतलनिवास पुगेर राष्ट्रपति भण्डारीसँग भेट गरेका थिए ।

संसद्को ०७४ को चुनावमा बर्दिया–१ बाट पराजित भएका गौतम डेढ वर्षदेखि संसद् प्रवेश गर्न अनेकन प्रयास गर्दै आएका थिए । ‘अन्तर्घात’का कारण उनले चुनाव हारेको भन्दै पार्टीले पनि गौतमलाई सांसद बनाउने कोसिस गरेको थियो ।

पछिल्लोपटक गौतमलाई ओली र प्रचण्डले रवीन्द्र अधिकारीको निधनपछि खाली भएको कास्की–२ मा चुनाव लड्न प्रस्ताव गरेका थिए । तर, गौतमले अन्तर्घातको खतरा रहेको र चुनाव हारिने भन्दै आफू कास्की–२ बाट चुनाव नलड्ने सामाजिक सञ्जालबाट सार्वजनिक गरेका थिए ।

त्यसअघि डोल्पाका धनबहादुर बुढा र काठमाडौं–८ का रामवीर मानन्धरलाई राजीनामा गर्न लगाएर गौतमलाई चुनावी मैदानमा उतार्नेसम्मको चर्चा भएको थियो ।

तर, अनुकुल परिस्थिती नबनेपछि गौतम त्यसबाट पनि पछि हटेका थिए । सुरुमा राष्ट्रिय सभा सदस्य समेत बन्न नमानेका उनी अन्ततः शनिबारको सचिवालय बैठकमा राष्ट्रिय सभामा प्रवेश गर्न सहमत भएका हुन् ।