नियमित उडानमा फर्कियो चीन गएको वाइडबडी विमान

काठमाडौं - चीनको हुवान प्रान्तको वुहान शहरबाट नेपालीलाई ल्याएको राष्ट्रिय ध्वजावाहक नेपाल वायु सेवा निगमको वाइड बडी ए-३३० जहाजले आज (मंगलबार)देखि नियमित उडान गर्ने भएको छ।

वुहानबाट १७५ जना नेपालीलाई काठमाडौं ल्याएको सो वाइड बडी जहाजले अन्तर्राष्ट्रिय सुरक्षा मापदण्डअनुरुप ४८ घण्टा क्वारेन्टाइनको समय पार गरेपछि नियमित उडानमा फर्किएको हो। उक्त जहाजबाट कोरोना भाइरस फैलिएको वुहानबाट यही फागुन ४ गते बिहान नेपालीलाई स्वदेश ल्याइएको थियो। जहाजको क्वारेन्टाइनको अवधि आज बिहान सकिएपछि दिउँसो सरसफाइ गरेर उडानयोग्य बनाइएको छ।

निगमको निर्धारित तालिकाअनुसार वाइडबडी जहाजले आज राति साढे १० बजे दोहाका लागि उडान भर्नेछ। जहाजलाई विश्व स्वास्थ्य सङ्गठनको मापदण्डअनुसार सबै प्रक्रिया पूरा गरि नियमित उडानमा ल्याउन लागिएको निगमले जनाएको छ। जहाजलाई विमानस्थलको उत्तरपूर्वतर्फको ‘रिमोट पार्किङ वे’ मा राखिएको छ।