क्वारेन्टाइनमा रहेका नेपालीको नियमित स्वास्थ्य परीक्षण, १७ दिनपछि घर जान पाउने

काठमाडौं– चीनको वुहानबाट उद्धार गरिएका नेपालीहरुको क्वारेन्टाइन अवधिभर नियमित स्वास्थ्य परीक्षण हुने स्वास्थ्य तथा जनसंख्या मन्त्रालयले जनाएको छ ।

मन्त्रालयले विज्ञप्ति जारी गर्दै भनेको छ, ‘क्वारेनटाइनको सम्पूर्ण अवधिभर नियमित स्वास्थ्य जाँच, शंकास्पद लक्षण देखा देखिएमा प्रयोगशाला परीक्षणको व्यवस्था तथा अस्पतालमा आइसोलेसनमा राखेर उपचार गर्ने गरी सम्पूर्ण व्यवस्था मिलाइएको छ ।’

क्वारेन्टाइनमा रहेका विद्यार्थीको अहिलेसम्म स्वास्थ्य अवस्था ठिक रहेको चिकित्सकहरुले बताएका छन् । क्वारेनटाइनमा राखिएका १ सय ७५ जनाको आइतबार खकार परीक्षणको लागि प्रयोगशालामा पठाइएको छ भने रिपोर्ट भोलि (बुधबार) आउने जनाइएको छ ।

साथै क्वारेनटाइनको चौधौं दिनमा पनि उनीहरुको खकार परीक्षण गरिनेछ । त्यसको रिपोर्ट आउन तीन दिन लाग्ने भएकोले क्वारेन्टाइनको अवधि १७ दिन पुग्ने भएको छ ।

नेपाल सरकारले शनिबार राति चीनको वुहानबाट १ सय ७५ जना नेपालीहरुलाई नेपाल एयरलाइन्सको विमानबाट उद्धार गरेको थियो ।