‘शासकहरु नैतिकवान नहुँदा उत्कृष्ट संविधान पनि संकटमा’

भैरहवा । वरिष्ठ अधिवक्ता दिनेश त्रिपाठीले नेपालको संविधान विश्वकै उत्कृष्ट भए पनि शासकहरुमा नैतिकता नहुँदा संकटमा परेको बताएका छन् । नेपाल मानव अधिकार संगठन जिल्ला शाखा रुपन्देहीले आयोजना गरेको मानव अधिकार प्रशिक्षण कार्यक्रमलाई सम्बोधन गर्दै त्रिपाठीले भने, ‘नेपालको संविधान विश्वकै उत्कृष्ठ संविधान हो । तर अहिले शासकहरु नैतिकवान नहुँदा बारम्बार समस्या निम्तिरहेको छ ।”

त्रिपाठीले जहाँको नागरिक सचेत हुँदैन, त्यहाँ राम्रोसँग संविधान पनि लागू नहुने गरेको बताउँदै संविधानको सफल कार्यन्वयनको लागि शासकहरुमा नैतिकता र जनतामा सजगता जरुरी रहेको बताए । उनले संविधानको उत्कृष्टता भनेको कागजमा लेखेर मात्रै नहुने तर जनताको मनमनमा हुनुपर्ने पनि बताए ।

सो अवसरमा प्रा.डा. गोविन्द ढकालले मानव अधिकारको सुशासनको पक्षमा चाँडो सेवा प्रवाह भएको बताए । नेपाल मानव अधिकार संगठन जिल्ला शाखा रुपन्देहीका अध्यक्ष प्राध्यापक सुदर्शन प्रसाद नेपालले मान्छे जन्मँदै अधिकार पाएको तर त्यसको कार्यान्वयनमा उत्सुकता नदेखाएको बताए । सिद्धार्थनगर नगरपालिका उपप्रमुख उमा काफ्लेले स्थानीय सरकारले जनताको संविधान प्रदत्त अधिकार प्रत्याभूत गर्न कुनै कमी नगरेको बताइन् ।

कार्यक्रममा मानव अधिकार र संविधानको विषयमा सरोकारवालालाई प्रशिक्षण दिइएको नेपाल मानव अधिकार संगठन जिल्ला शाखा रुपन्देहीका सचिव पवन पौडेलले बताए । संगठनले मानव अधिकारको क्षेत्रमा जिल्लाका सर्वसाधारण, प्रहरी प्रशासनका प्रतिनिधि, राजनैतिक दल, संघसंगठनका प्रतिनिधिहरुलाई प्रशिक्षण दिएको हो।