आरआर क्यम्पसमा नेविसंघ र अखिल कार्यकर्ताबीच झडप, तीनजना घाइते

काठमाडौं। प्रदर्शनीमार्गस्थित रत्नराज्य लक्ष्मी क्याम्पसमा सत्तारुढ नेकपा निकट विद्यार्थी संगठन अनेरास्ववियु र प्रतिपक्षी नेपाली कांग्रेस निकट विद्यार्थी संगठन नेपाल विद्यार्थी संघका कार्यकर्ताबीच आज झडप भएको छ।

झडपमा नेपाल विद्यार्थी संघका तीनजना कार्यकर्ता घाइते भएका छन्। घाइते हुनेमा आविश्कार पौडेल, कुशल बस्नेत र सुमन खड्का रहेका छन्। उनीहरुको मोडेल अस्पतालमा उपचार भइरहेको छ ।

नेपाल विद्यार्थी संघका महामन्त्री दिपक भट्टराईका अनुसार कक्षाकोठामा पढ्नका लागि गइरहेका नेपाल विद्यार्थी संघका कार्यकर्तामाथि आक्रमण भएको हो। झडप भएपछि प्रहरीले नेपाल विद्यार्थी संघका केही कार्यकर्तालाई पक्राउ गरेको छ । पक्राउ पर्नेमा पुष्कर बाँस्तोला, सन्जीब ढकाल, रामजी बस्नेत, उमेश गुरुङ र विकु खड्का रहेका छन् ।

पक्राउ परेका विद्यार्थीलाई नेपाल पुलिस क्लबमा राखिएको छ। नेपाल विद्यार्थी संघका महामन्त्री भट्टराईले विज्ञप्तिमार्फत् घटनाको भर्त्सना गरेका छन् । महामन्त्री भट्टराईले पक्राउ परेका विद्यार्थीको तत्काल रिहाईको माग गर्दै घटनाको निष्पक्ष छानविनको माग गरेका छन् ।

सत्ताको आडमा प्रहरी प्रशासनले नेपाल विद्यार्थी संघका कार्यकर्तामाथि भएको आक्रमणको निष्पक्ष छानविन भएर दोषिमाथि कारवाही नभएर देशव्यापी आन्दोलन गर्ने भट्टराईले विज्ञप्तीमा उल्लेख गरेका छन् ।