सेना लिएर रक्षामन्त्री पोखरेल गए कालापानी

दार्चुला- भारतले आफ्नो राजनीतिक नक्सामा कालापानीलाई समेटेपछि पहिलो पटक नेपाल सरकारका मन्त्री कालापानी क्षेत्रमा गएका छन् ।

उपप्रधानमन्त्री तथा रक्षामन्त्री ईश्वर पोखरेल आज (सोमबार) नेपाली सेनाको हेलिकोप्टरमार्फत कालापानी क्षेत्रमा उडेका छन् । सेनाको एनए ०५८ नम्बरको हेलिकोप्टर लिएर रक्षा मन्त्री पोखरेल केहि सेनासहित त्यसतर्फ उडेका हुन्।

उपप्रधानमन्त्रीको टोलीमा १० जना सहभागी रहेको जनाइएको छ। कालापानीको वस्तुस्थिती बुझ्न मन्त्रीसहित जनप्रतिनिधी र सेनाका प्रतिनिधि त्यसतर्फ गएको उनको सचिवालयले जनाएको छ ।

मन्त्री पोखरेल हिजो (आइतबार) नै दार्चुला पुगेका थिए । उनले हिजै दार्चुलास्थित नेपाली सेनाको व्यारेक पहिलोपटक निरीक्षण गरेका छन् ।

भारतले आफ्नो नक्सामा नेपाली भूभागलाई समेटेको भन्दै चर्को विरोध हुँदै आएको थियो । विरोधपछि सरकारले भारतीय नक्सा सच्याउँन कूटनीतिक रुपमा दबाब दिने बताउँदै आएको थियो । तर, अझैसम्म नक्सा सच्चिएको छैन् ।

फागुन ३ गते संसद्मा सम्बोधन गर्दै प्रधानमन्त्री केपीशर्मा ओलीले कालापानी क्षेत्र फिर्ता गर्न सरकार सक्रिय भएको बताएका थिए । त्यसको भोलिपल्टै दार्चुला उडेका रक्षामन्त्री आज कालापानी क्षेत्र जान लागेका हुन् ।

कालापानी क्षेत्रमा मन्त्रीस्तरिय भ्रमण पहिलो पटक हुन लागेको हो । उक्त क्षेत्रमा सशस्त्र प्रहरीको बिओपी निर्माण गर्ने तयारी गरिएको छ ।