लमजुङ दरबार प्रहरीको कब्जामा, राखियो अस्थायी पोष्ट

लमजुङ- लमजुङको बेँसीशहर नगरपालिका–३ गाउँशहरस्थित लमजुङ दरबारमा प्रहरी पोष्ट खडा गरिएको छ । ऐतिहासिक दरबारमा आइतबार प्रहरीले अस्थायी पोष्ट स्थापना गरेको हो ।

पर्यटकका लागि आकर्षक गन्तब्य मानिएको लमजुङ दरबारमा प्रहरीले कब्जामा लिएको भन्दै स्थानीयले विरोध गरेका छन् । विरोधकाबीच आइतबार प्रहरीले अस्थायी पोष्ट खडा गरेको हो ।

प्रहरी पोस्ट्को बेँसीशहर नगरपालिकाका प्रमुख गुमानसिंह अर्याल र जिल्ला प्रहरी कार्यालयका प्रहरी नायब उपरीक्षक रवीन्द्रमान गुरुङले संयुक्त रुपमा गरेका थिए ।

प्रहरी नायब उपरीक्षक गुरुङले गाउँशहर ऐतिहासिक लमजुङ दरबार रहेको, धार्मिक महत्व बोकेको ठाउँ र यहाँ काउलेपानी घरवाससमेत सञ्चालन भएकाले विभिन्न घटना हुनसक्ने भएकाले सुरक्षा आवश्यक रहेकाले अस्थायी पोष्ट स्थापना गरिएको दाबी गरे ।

वडाध्यक्ष सूर्यकुमार श्रेष्ठले प्रहरी पोस्ट् स्थापनाले गाउँले सुरक्षित हुने बताए ।

यसक्षेत्रमा प्रहरी पोस्ट् आवाश्यक रहेपनि दरबार परिसमै राखेकोमा केहि स्थानीयले असन्तुष्टि जनाएका छन् । उनीहरुले सुरक्षाका दृष्टिकोणले राम्रो भएपनि प्रहरीले दरबार नै कब्जा गरे जसरी बस्दा नकारात्मक सन्देश जाने उनीहरुको तर्क छ ।

गाउँशहरमा सोह्रौँ शताब्दीमा निर्माण गरिएको लमजुङ दरबार नेपालकै पुरानो दरबार मानिन्छ । यो दरबार समुद्री सतहदेखि एक हजार ४४५ मिटर उचाइमा रहेको छ ।

शाह वंशीय राज्यकालको उद्गमथले लमजुङ र त्यसैको विरासत लमजुङ दरबार रहेको छ । कास्कीकोटका राजा कुलमण्डलका माइला छोरा कालु शाहलाई लमजुङका खजेदुरालगायतले यहाँ ल्याएर राजा बनाएको इतिहास रहेको छ ।

त्यसको केही समयमै लमजुङमा शासनको बागडोर सम्हालेका तत्कालीन घलेराजाका सेनाले कालु शाहको हत्या गरिदिएको ऐतिहासिक कथन छ । सो घटनापछि उनीहरुले नै कुलमण्डलका कान्छा छोरा जशमु शाहलाई पुनः कास्कीकोटबाट ल्याएर राजकाज अघि बढायो ।

राजालाई १५ असार रविबारका दिन १५ घडीको सिंह लग्नमा विसंं १५५० मा राजगादी गराएको ऐतिहासिक शिलालेखमा उल्लेख छ ।

त्यसपछि विभिन्न नामका राजाले यो दरबारबाटै लमजुङको बागडोर सम्हालेको थियो । धेरैपछि यशोबह्मा शाह राजा भयो । उनको मृत्युपछि उहाँका जेठा छोरा नरहरि शाह राजा भए । उनीपछि विभिन्न शाह राजा भई लमजुङको अन्तिम राजा वीर शाह रहेका थिए ।

विसं १८३८ सम्म शाह वंशले लमजुङ दरबारमा राजा भएर राजगद्दी सम्हालेको स्थानीय बताउँछन् । त्यस्तै यस दरबार नजिकै काउलेपानी घरवास सञ्चालनमा रहेको छ ।