शान्ति स्तुपका निर्मातालाई बुद्ध शान्ति पदक

भैरहवा– प्रदेश ५ सरकारले स्थापना दिवसको अवसर पारेर ३५ जनालाई विभिन्न पदकबाट विभुषित गरेको छ । प्रदेश ५ का प्रदेश प्रमुख धर्मनाथ यादवले वितरण गरेको पदक पाउने ३५ जनामध्ये जापानी नागरिक भिक्षु नामातामे पनि एक हुन् ।

बुद्ध शान्ति पदक प्रथमबाट विभुषित स्वर्गीय युताका नामातामे लुम्बिनिस्थित शान्ति स्तुपको निर्माणकर्ता हुन्। भिक्षु नामातामे सन् १९५२ अगष्ट ७ मा जापानको इवालागीमा जन्मेका हुन् र १९९३ मा लुम्बिनीमा शान्ति स्तुप बनाउने र लुम्बिनी बस्ने गरी आएका थिए। सन् १९९३ नोभेम्बर ३० मा शान्ति स्तुपको शिलान्यास भयो ।

शान्तिस्तुप निर्माण गर्न सक्रिय ४५ वर्षीय नावातामेको १९९७ जुलाई ३ को राति सुतिरहेको बेला लुम्बिनीमा हत्या भएको थियो । उनी मरेर गए पनि भिक्षु नामातामेले निर्माण थालेको लुम्बिनी शान्ति स्तुप सबैका लागि आर्कषक स्तुप भएको छ ।

मरणोप्रान्त बुद्धशान्ति पदकबाट विभुषित नामातामेको पदक उनका उत्तराधिकारीका रुपमा शान्ति स्तुपमा रहेका भिक्षु मा सातोलाई प्रदान गरिएको छ।