अवैध लागूऔषध सहित ३ जना पक्राउ

काठमाडौं- प्रहरीले विभिन्न स्थानबाट लागूऔषधसहित ३ जनालाई पक्राउ गरेको छ।

मकवानपुर र बाँकेमा लागूऔषध ब्राउनसुगर र गाजाँसहित प्रहरीले ३ जनालाई पक्राउ गरेको हो।

प्रहरीका अनुसार मकवानपुरको हेटौंडा उपमहानगरपालिका–१९ नेवारपानीबाट करिब ३३ किलो किलोग्राम गाँजासहित एक भारतीय नगरिक पक्राउ परेका छन्।

पक्राउ पर्नेमा भारत चम्पारणका ४० वर्षीय भगवान यादव छन्। शनिबार बिहान जेएच ०९ ए ८३६१ नम्बरको कार चेकजाँचका क्रममा अन्य ४ जना भागेको र यादव पक्राउ परेको प्रहरीले जनाएको छ।

कारको सिटमूनि टायरभित्र लुकाएर राखेको अवस्थामा गाँजा फेला परेको प्रहरीले जनाएको छ। अन्य ४ जनाको खोजीकार्य भैरहेको प्रहरीले जनाएको छ।

यस्तै नेवारपानीबाटै २ किलोग्राम ७ सय ग्राम गाँजा बरामद गरेको प्रहरीले जनाएको छ। चितवनबाट हेटौंडातर्फ जाँदै गरेको लु.२ ख ३ नम्बरको बसमा सिटमूनि झोलाभित्र राखेको अवस्थामा उक्त गाँजा बरामद गरेको प्रहरीले जनाएको छ।

यस्तै प्रहरीले नेपालगंज उपमहानगरपलिका–१५ बाट ब्राउनसुगर १ ग्रामसहित जुम्ला चन्दननाथ नगरपालिका–४ का ३० वर्षीय योगेन्द्र मल्ल र ३० वर्षीय हरि थापालाई शनिबार बिहान पक्राउ गरेको जनाएको छ।