जुठो खाएपछि एकै परिवारका नौ जना कोरोनाबाट संक्रमित, एकै दिनमा ९७ को मृत्यु

एजेन्सी- हङकङमा एक अर्काको जुठो खाँदा एकै परिवारका नौ जना कोरोना भाइरसबाट संक्रमित भएका छन् ।

साउथ चाइना मर्निङ पोस्टले लेखेअनुसार उनीहरुले एक अर्काको जुठो खाएकै कारण नौ जनालाई नै कोरोना भाइरस सरेको पुष्टि भएको हो । नौ मध्ये को को पहिल्यै कोरोनाबाट संक्रमित थिए र क कसलाई पछि सर्यो भन्ने बारे भने खुल्न नसकेको साउथ चाइना मर्निङ पोस्टले लेखेको छ ।

यही जनवरी २६ मा हङकङको कुवुन टोङस्थित लेन्टो पार्टी कोठामा उनीहरू भेला भएर आपसमा हाटपट र बार्बेक्यु खाना साटासाट गरेर खाएका थिए।

कोरोनाबाट एकै दिनमा ९७ को मृत्यु, मर्नेको संख्या ९०८ पुग्यो

नोवेल कोरोना भाइरसबाट आइतबार मात्रै चीनमा ९७ जनाको मृत्यु भएको छ । कोरोनाका कारण एकै दिन यति धेरै मानिसको मृत्यु भएको यो पहिलो घटना हो ।

चीनमा हालसम्म ९०८ जनाको मृत्यु भएको चीनको स्वास्थ्य संगठनले पुष्टि गरेको छ। अहिलेसम्म चीनमा नोवेल कोरोनाका ४० हजार १७१ जना संक्रमित भएको पुष्टि भएको छ ।

हाल एक लाख ८७ हजार ५१८ जनालाई निगरानीमा राखिएको छ । चीनले दिएको तथ्यांक अनुसार अहिलेसम्म तीन हजार २८१ जना उपचारपछि नोवेल कोरोना भाइरसको संक्रमण मुक्त भएर घर फर्किएका छन् ।