सरकार गुलामी मानसिकताले ग्रस्तः नेकपा माओवादी (क्रान्तिकारी)

जनकपुरधाम– मोहन वैद्य नेतृत्वको नेकपा माओवादी (क्रान्तिकारी) ले केपी ओली नेतृत्वको सरकार गुलामी मानसिकताले ग्रस्त रहेको आरोप लगाएको छ । एमसीसी सम्झौता गर्न आतुर हुनुले सरकारको गुलामी मानसिकतालाई प्रष्ट पारेको उसले जनाएको छ ।

नेकपा माओवादी (क्रान्तिकारी) का प्रवक्ता हरिभक्त कँडेलले एमसीसी सम्झौता खारेज नगरिए हदैसम्मको आन्दोलन गर्ने चेतावनी दिएका छन् । शनिबार जनकपुरमा पत्रकार सम्मेलन आयोजना गरी कँडेलले एमसीसी सम्झौता गरेर सरकार मुलुकलाई विदेशीहरुको जिम्मा लगाउन खोजेको आरोप लगाए ।

चीन तथा भारतले अतिक्रमण गरेको नेपाली भू–भाग फिर्ता र एमसीसीको विरोधमा आफूहरु सहित ९ वामदल विरोधमा उतरिसकेको उनले जानकारी दिए ।

छिमेकी राष्ट्रबाट नेपाली भू–भागको अतिक्रमण र एमसीसीविरुद्ध उनको पार्टीले देशभर अभियान सञ्चालन गरिरहेको कँडेलको भनाइ थियो । उनले विभिन्न सन्धि सम्झौताको नाउँमा कम्युनिष्ट नेतृत्वको सरकारले मुलुकलाई गुलाम बनाउन खोजेको आरोप लगाए ।

एमसीसीमा उल्लेख गरिएका गुणस्तर सडक र विद्युत प्रसारण ग्रिडलगायतका बुँदा देश र जनतालाई सय वर्षसम्म विदेशीको गुलाम बनाउने निश्चित रहेको कँडेलले बताए ।