कान्तिपुर सिटी कलेजमा प्रहरीको लाठीचार्ज

काठमाडौं– पुतलीसडकस्थित कान्तिपुर सिटी कलेजमा शनिबार प्रहरीले लाठीचार्ज गर्दा केही शिक्षक र विद्यार्थी घाइते भएका छन् ।

एक सातादेखि क्याम्पस सुधारका विभिन्न माग राखेर आन्दोलनरत अनेरास्ववियूको मागको बेवास्ता गर्दै क्याम्पसले जबर्जस्ती ताला खोलेपछि आक्रोशित विद्यार्थीले क्याम्पसमा तोडफोड र नाराबाजी गरेका थिए।

सोही क्रममा प्रहरी क्याम्पसभित्र प्रवेश गरी अन्धाधुन्ध लाठीचार्ज गरेको एक विद्यार्थीले बताए। झडपपछि प्रहरीले केही विद्यार्थीलाई पक्राउ गरेको छ। झडपमा घाइते भएका विद्यार्थीको काठमाडौं मोडल अस्पताल र ट्रमा सेन्टरमा उपचार भइरहेको छ।

विद्यार्थी संगठनले विभिन्न माग राखी कलेजमा तालाबन्दी गरेकोमा कलेज प्रशासनले प्रहरी लगाएर ताला फोड्न खोज्दा तनाव उत्पन्न भएको हो ।

कलेजले विज्ञप्ति निकाल्दै लाठीचार्जबाट घाइते भएका शिक्षक तथा विद्यार्थीको स्वास्थ्य लाभको कामना गरेको छ । साथै सरोकारवाला पक्षसँग वार्ताको माध्यमबाट समस्या समाधानका लागि आग्रह गरेको छ ।