बिराटनगर बखरीमा मृतअवस्थामा फेला परेकी महिलाको सनाखत

विराटनगर– शुक्रबार विहान विराटनगर महानगरपालिका–१२ बखरीस्थित उखुबारीमा फेला परेको महिला शवको सनाखत भएको छ।

मोरङका प्रहरी उपरीक्षक विश्व अधिकारीले ती महिला दुहवी–६ का वसन्त परियारकी पत्नी ३२ वर्षीया सम्झाना खत्री (परियार) रहेको जानकारी दिए।

घाँटीमा काटेको चोट रहेकाले उनको हत्या नै भएको अधिकारीले बताए।

प्रहरीले अनुसन्धानका लागि २ जनालाई नियन्त्रणमासमेत लिएको छ। काठमाडौंमा कपडा सिलाउने काम गर्ने वसन्तले अफु मंगलबार मात्र घरमा पुगेको र सोही दिनबाट सम्झना बेपत्ता रहेको प्रहरीलाई जानकारी दिएका छन्।

शुक्रबार उखु काट्न गएका मजदुरले शव देखेपछि प्रहरीलाई खबर गरेका थिए ।

घट्नास्थल र उनीहरुको घर करिव २० किलोमिटरको दुरीमा छ। उनीहरुको दुई छोराछोरी छन्।

शव पोष्टमार्टमका लागि कोशी अञ्चल अस्पतालमा राखिएको र घटनाबारे थप अनुसन्धान भइरहेको अधिकारीले जानकारी दिए।