सरस्वतीको गोलपोष्टमा मछिन्द्रको आधा दर्जन गोल

काठमाडौं - शहीद स्मारक ए डिभिजन लिग अन्तर्गत एघारौं चरणको पहिलो खेलमा मछिन्द्र क्लबले सरस्वती युथ क्लबलाई जारी लिगकै ठूलो गोलअन्तरले हराएको छ। सातदोबाटोस्थित एन्फा कम्प्लेक्समा सम्पन्न खेलमा लिग दाबेदार मछिन्द्र क्लबले रेलिगेशन जोनको सरस्वती युथ क्लबलाई ६-१ ले हराएको हो।

खेलको पहिलो हाफमा एक गोलको मात्रै अग्रता बनाएको मछिन्द्रले दोस्रो हाफमा पाँच गोल थप्यो। देवेन्द्र तामाङले खेलका ४० औं मिनेटमा गोल गर्दै टोलीलाई सुरुवाती अग्रता दिलाए।

त्यस्तै, खेलको दोस्रो हाफमा दिपक राईले दुई गोल तथा विसाल राई, एडिलेजा सोमिडे, आन्ड्रेस नियाले एक/एक गोल गरे। खेलको ८७ औं मिनेटमा सरस्वतीका काजिम बुसारीले सान्त्वना गोल फर्काए।

जितसँगै मछिन्द्र तालिकाको शीर्ष स्थानमा उक्लिएको छ। उसले ११ खेलमा ८ जित र २ बराबरी खेल्दै २५ अंक बनाएको छ। दोस्रो स्थानमा रहेका त्रिभुवन आर्मी क्लबको २३ अंक छ। उता, लगातार हारको सामना गरिरहेको सरस्वती युथ क्लब रेलिगेशन जोन भन्दा माथि उठ्न सकिरहेको छैन्।