नेकपाद्वारा संसदमा विष्णु पौडेलको बचाउ, कांग्रेसको आलोचना

काठमाडौं– सत्तारुढ नेपाल कम्युनिष्ट पार्टी (नेकपा)का सांसदले बालुवाटार काण्डमा आफ्ना नेताहरुको बचाउ गरेका छन्। राष्ट्रियसभाको विहीबारको बैठकको विशेष समयमा बोल्दै नेकपा सांसद रामनारायण विडारीले जग्गा खरिद गर्ने महासचिव विष्णु पौडेल र वरिष्ठ नेता माधव कुमार नेपालको बचाउ गरेका हुन्।

उनले प्रमुख प्रतिपक्षी नेपाली कांग्रेसको आलोचनासमेत गरेका छन्। ‘भ्रष्टाचार विरुद्धको कारवाहीमा किन विरोध गरेको ?’ भनेर प्रश्न गर्दै विडारीले भने, ‘यही सरकारले सुन तस्कारलाई पक्राउ गर्यो। तर, पनि खोइ ठूलो माछा भनेर उफ्रिएका छन्। न्यायाधिशलाई पनि कारवाही गरिएको छ। प्रहरीका हाकिमहरु पनि झ्यालखानामा छन्। अख्तियारका आयुक्त पनि कारवाहीमा परे। उपप्रधानमन्त्री भएर बसेका, मन्त्रीहरु बनेर बसेका र ठूला व्यापारीहरुलाई कारवाही गर्यो। सरकारलाई धन्यवाद दिनुपर्ने होइन र ?’

विडारीले थपे, ‘कारवाही गरे पनि फलानोलाई किन नगरेको उसलाई किन गरेको भनेर भन्छन्। मनसाय बेगर गरेको काम अपराध हुँदैन। आफ्नो मान्छे परे विरोध गर्ने काम कति समयसम्म नेपालले खप्ने ? मान्छेले जग्गा किन्छ, पछि जग्गा किनेपछि उसलाई के थाहा हुन्छ ? कसलाई मुद्दा चलाउने कसलाई नचलाउने भनेर निर्क्योल गर्ने काम महान्याधिवक्ताको हो, प्रतिपक्षीको होइन।’

अब अदालतले फैसला गर्ने बताउँदै विडारीले बहुमतको सरकारको आलोचना गर्ने कांग्रेसलाई पनि बहुमत ल्याएर देखाउन चुनौती दिए । नत्र संविधान संशोधन गरेर प्रतिपक्षीले सरकार चलाउने र बहुमत ल्याउने प्रतिपक्षमा बस्ने व्यवस्था गर्नुपर्ने भन्दै उनले व्यंग्य पनि गरे।