महाअभियोगबाट बचे राष्ट्रपति ट्रम्प, फेरि उम्मेदवार बन्न पाउने

वाशिङ्टन– अमेरिकी राष्ट्रपति डोनाल्ड ट्रम्पले महाअभियोगबाट सफाइ पाएका छन्। ट्रम्पलाई उनको पार्टी रिपब्लिकनको बहुमत भएको माथिल्लो सदनले सफाइ दिएको हो।

१८ डिसेम्बर २०१९ मा विपक्षी पार्टी डेमोक्रयाटको बहुमत रहेको अमेरिकी संसदको तल्लो सदनले ट्रम्पमाथि शक्तिको दुरुपयोग र संसदको कार्य सम्पादनमा अवरोध गरेको आरोपमा महाअभियोग लगाएको थियो।

शक्तिको दुरुपयोग अभियोगमा ५२–४८ मतले ट्रम्पले सफाइ पाए भने संसदको कार्य सम्पादनमा अवरोध गरेको अभियोगमा ५३–४७ मत आयो।

बुधबार भएको मतदानमा सिनेटले अमेरिकाका ४५ औँ राष्ट्रपतिलाई बर्खास्त नगर्ने पक्षमा मत दिएको हो। दुई अभियोगमध्ये एकमा पनि सिनेटमार्फत ट्रम्प दोषी ठहर भएको भए उनी बर्खास्त हुने थिए र सत्ता उपराष्ट्रपति माइक पेन्सको हातमा जाने थियो।

सफाइ पाएपछि ट्रम्प आगामी नोभेम्बरमा हुने राष्ट्रपतिको चुनावका लागि उमेदवार बन्‍ने बाटो खुला भएको छ।

ट्रम्पले महाअभियोगबाट सफाइ पाएपछि ट्विट गर्दै महाअभियाेगमा जित भएकोले ह्वाइट हाउसबाट सम्बोधन गर्ने बताएका छन्।

सीएनएन