कोरोना भाइरसबाट मर्नेको संख्या ५६२ पुग्यो, चीनबाहिर दुईजना

बेइजिङ– चीनको वुहानबाट सुरु भएको नोवल कोरोना भाइरसको संक्रमणबाट अहिलेसम्म ५६२ जनाको मृत्यु भएको छ। त्यसैगरी चीनसहित विश्वभरका विभिन्‍न मुलुकमा गरी २८ हजारभन्दा बढीमा यसको संक्रमण भएको बताइएको छ।

विश्व स्वास्थ्य संगठनका अनुसार चीन बाहिर फिलिपिन्स र हङकङमा एक–एकजनाको मृत्यु भएको छ।

अहिलेसम्म कोरोनाविरुद्धको उपचारका लागि छुट्टै खोप बनिनसकेको भए पनि थाइल्यान्डका चिकित्सकहरुले एन्टि ड्रगको प्रयोगबाट उपचार गरिरहेको र संक्रमित निको भएको दाबी गरिएको छ।

यो भाइरसको संक्रमण चीनमा महामारीको रुपमा फैलिएपछि विभिन्‍न मुलुकले वुहानमा रहेका आफ्ना नागरिकलाई उद्धार गरेर फिर्ता लगेका छन्।

त्यसैगरी अमेरिका, अस्ट्रेलिया लगायतका मुलुकहरुले चीनका पर्यटकहरुलाई अस्थायी रुपमा प्रतिबन्ध लगाएका छन्। उनीहरुले १४ दिनेदेखि वुहानमा रहेका कुनै पनि विदेशीलाई समेत आफ्नो मुलुक प्रवेशमा रोक लगाएका छन्।

एजेन्सी