मनाङको अपराजित यात्रामा ब्रेक, सन्तोष बने शीर्ष गोलकर्ता

काठमाडौं– जारी सहिद स्मारक ए डिभिजन लिग अन्तर्गत आजको दोस्रो खेलमा च्यासल युथ क्लब विजयी भएको छ। सातदोवाटोस्थित एन्फा कम्प्लेक्समा सम्पन्न खेलमा च्यासलले साविक विजेता मनाङ मर्स्याङ्दी क्लबलाई १–० को गोल अन्तरले हराएको हो।

खेलको २४ औं मिनेटमा च्यासलका विदेशी खेलाडी टैगा नकामुराले गोल गरेका थिए। च्यासलले फ्री किकमा पाएको अवसरको सदुपयोग गरेर खेलमा पहिलो स्कोर गरेको थियो।

खेलको इन्ज्युरी समयमा सन्तोष साहुखलले व्यक्तिगत पहिलो गोल गर्दै टिमको अग्रतालाई दोब्बर बनाएका थिए। त्यसपछि मनाङले खेलमा फर्कने अवसर नै पाएन।

अन्ततः मनाङले जारी लिगमा पहिलो हार खाएको छ। यो हारसँगै उसको अपराजित यात्रामा समेत ब्रेक लागेको हो।

जितसँगै च्यासल युथ क्लबले अंक तालिकामा एक स्थान सुधार गरेको छ। उसले लिगमा तेस्रो जित निकाल्दै तीन बराबरीका साथ १२ अंक बनाएको छ। च्यासल हाल नवौं स्थानमा छ।

त्यस्तै, मनाङ १९ अंकका साथ तेस्रो स्थानमा छ। मनाङ शीर्षस्थानको आर्मी भन्दा ४ अंकले पछि छ भने दोस्रो स्थानको मछिन्द्रभन्दा ३ अंकले पछि छ।

सन्तोष सर्वाधिक गोलकर्ता

आजको खेलमा गोल गरेसँगै जारी लिगमा सन्तोषको व्यक्तिगत गोल ७ पुगेको छ। उनले आज मनाङविरुद्धको खेलेको इन्ज्युरी समयमा गोल गरेसँगै उनको गोलसंख्या ७ पुगेको हो।

त्रिभुवन आर्मी क्लबका नवयुग श्रेष्ठ ६ गोलसहित शीर्ष गोलकर्ताको दोस्रो स्थानमा छन्।