कोरोना भाइरसबाट मर्नेको संख्या ३६२, अमेरिकामा ११ जनामा संक्रमण

काठमाडौं– चीनमा फैलिएको कोरोना भाइरस संक्रमणमा ३६२ जनाको ज्यान गएको छ।

भाइरस संक्रमणबाट विश्वभर १७ हजार ३ सय मानिस प्रभावित भएका छन्।

मृत्यु हुने ३६१ जना चीनका छन् भने एकजना फिलिपिन्सका छन्। चीनको हुवानमा डिसेम्बरमा देखा परेको कोरोना भाइरस अहिलेसम्म २५ देशमा फैलिएको छ।

अमेरिकामा ११ जनामाथि संक्रमण पुष्टि

संयुक्त राज्य अमेरिकामा ११ जनामाथि कोरोना भाइरस संक्रमण भएको पुष्टि भएको छ।

क्यालिफोर्नियाका एकजना ५७ वर्षीय पुरुषबाट अमेरिकामा कोरोना संक्रमण भएको अधिकारीहरूले बताएका छन्।

ती पुरुषले केही समयअघि चीनको हुवानको भ्रमण गरेका थिए।

अमेरिककाको एरिजोनामा १, क्यालिफोर्नियामा ६, इल्लिनोसमा २, म्यासाचुसेट्समा १ र वासिङ्टमा १ जनामा संक्रमण देखिएको छ।

हङकङमा चिनियाँ सीमा बन्द गर्न मतदान

हङकङका हजारौं स्वास्थ्य अधिकारीहरूले चीनसँग ५ दिनसम्म सीमानाका बन्द गर्नुपर्ने पक्षमा मतदान गरेका छन्।

अस्पतालका कर्मचारीको एलाइन्समा आबद्ध १३ हजारले मतदान गरेका थिए।

हङकङ सरकारले आन्दोलनकारी स्थास्थ्य अधिकारीहरूसँग वार्ताका लागि आह्वान गरेको छ। 

सार्सले भन्दा बढीको मृत्यु

चीनमा सन् २००३ मा फैलिएको सार्सका कारण ३४९ जनाको मृत्यु भएको थियो। अहिले कोरोना भाइरसबाट मर्नेको संख्या सार्सको भन्दा बढेको छ। त्यतिबेला सार्सका कारण विश्वभर ७७४ को ज्यान गएको थियो।