सर्लाहीका उखु किसानद्वारा पुनः आन्दोलनको घोषणा

सर्लाही- चिनी उद्योगले सरकारसँग गरेको प्रतिवद्धता अनुसार रकम भुक्तानी नगरेपछि सर्लाहीका उखु किसानले पुनः आन्दोलनको घोषणा गरेका छन्।

उखु किसान सङ्घर्ष समितिले आइतबार विज्ञप्ती जारी गरी पुनः तेश्रो चरणका आन्दोलनका कार्यक्रम सार्वजनिक गरेको हो।

उखु मिलहरुबाट पाउनुपर्ने रकम र अनुदान रकम सरकारले माघ ७ गतेभित्र भुक्तान गराउने सहमति गरेपनि रकम नपाउँदा आफुहरु पुनः आन्दोलनमा उत्रन बाध्य भएको समितिले जनाएको छ।

समितिले फागुन मसान्तसम्म किसानहरुले पाउनुपर्ने रकम भुक्तानी नपाए चैत्र ४ गतेदेखि पुनः राजधानी केन्द्रित आन्दोलन थाल्ने चेतावनी दिएको छ।

उनीहरुले माघ १९ गतेदेखि नै गाउँ गाउँमा पुगी किसानहरुले पाउनुपर्ने बक्यौता रकमको विवरण संकलन गर्ने, एक छाकमात्र खाना खाई खेतमा काम गर्ने, जागरण अभियान चलाउनेदेखि माइतीघर मण्डलामा आई रिले अनसन थाल्नेसम्मका कार्यक्रम सार्वजनिक गरेका छन्।

उद्योगमन्त्री लेखराज भट्ट आफैँले सहमति गरी आन्दोलन स्थगित गराई किसानलाई घर फर्काउनु भएको थियो।

माघ १९ भईसक्दासमेत किसानले जिल्लाको अन्नपूर्ण चिनी उद्योग धनकौल पश्चिम र महालक्ष्मी चिनी उद्योग बगदहबाट पूरा भुक्तानी पाएका छैनन्। अन्नपूर्णले अझै ३८ करोड र महालक्ष्मीले १० करोड बक्यौता भुक्तानी गर्न बाँकी छ।