लागुऔषध गाँजा मुद्दाका फरार दुई पक्राउ

काठमाडौं– लागुऔषध गाँजा मुद्दामा अदालतबाट कैद र जरिवानाको फैसला सुनाइएपछि फरार रहेका दुई जनालाई पर्सा प्रहरीले पक्राउ गरेको छ।

पर्सा जिल्ला अदालतबाट छुट्टाछुट्टै मुद्दामा कैद र जरिवानाको फैसला सुनाइएका पर्सा, बहुदरमाईन–७ का ३० वर्षीय राम विनोद प्रसाद कुश्वाहा र पर्सागढी नगरपालिका–५ का ३० वर्षीय मनोज रायलाई प्रहरीले पक्राउ गरेको जनाएको छ।

कुश्वाहलाई जिल्ला अदालतले २०७४ फागुन २२ गते लागुऔषध गाँजा मुद्दामा एक वर्ष कैद र पाँच हजार रूपैयाँ जरिवाना सजाय तोकेको थियो।

फरार प्रतिवादी पक्राउ गर्न गठन गरिएको प्रहरी टोलीले शनिबार घरमा लुकिछिपी बसिरहेको अवस्थामा कुश्वाहलाई पक्राउ गरेको हो।

यस्तै, लागुऔषध गाँजा चरेस मुद्दामा रायलाई जिल्ला अदालतले गत जेठ २ गते ९ महिना ३ दिन कैद र ५ हजार रूपैयाँ जरिवाना सजाय तोकेको थियो।

उनीहरूलाई प्रहरीले आइतबार बिहान गाउँघरमै लुकीछिपी बसेको अवस्थामा पक्राउ गरेको हो।

प्रहरीले दुवै जनालाई आवश्यक कारबाहीका लागि जिल्ला अदालतमा पठाएको जनाएको छ।