सरकार असफल र भ्रष्टः राप्रपा

काठमाडौं– राष्ट्रिय प्रजातन्त्र पार्टीले वर्तमान सरकार पूर्णरुपमा असफल भएको, नीतिगत भ्रष्टाचारमा लिप्त रहेको आरोप लगाएको छ।

राप्रपाको जारी केन्द्रीय समिति बैठकमा अध्यक्ष कमल थापाले प्रस्तुत गरेको राजनीतिक कार्यपत्रमा सरकारलाई असफल र भ्रष्ट भनिएको हो ।

कार्यपत्रमा देशमा धर्म परिवर्तनको डढेलो पसेको पनि उल्लेख गरिएको छ।

‘राज्य सञ्चालनको हरेक पक्षमा सरकार असफल प्रमाणित भएको छ। सरकारले सकारात्मक परिवर्तनको अनुभूति दिन सकेको छैन,’ कार्यपत्रमा भनिएको छ, ‘ लगानी प्रवर्धन, रोजगारी सिर्जना, भ्रष्टाचार नियन्त्रण, व्यापार घाटाको न्युनिकरण, शिक्षा र स्वास्थ्यको गुणस्तर अभिवृद्धि गर्ने सन्दर्भमा सरकार पुरै असफल भएको छ।’

गत १४ वर्षको राजनीतिक अभ्यासपछि अहिले देश झन् संकटग्रस्त हुँदै गएको, संस्थागत एवं नीतिगत भ्रष्टाचार बढेको, धर्मपरिवर्तनको डढेलो सल्किएको, बेरोजगारी समस्या बढेको, सर्वसत्तावाद र बाह्य शक्तिको चलखेलको चुनौती थपिएको समेत राप्रपाले औंल्याएको छ।