एरिक्सन इन्टर मिलानमा, रोजे २४ नम्बर जर्सी

काठमाडौं - टोटेनहमबाट प्रिमियर लिग खेलिरहेको मिडफिल्डर क्रिस्टियन एरिक्सनले इटालियन क्लब रोजेका छन्। उनी सिरी एमा राम्रो प्रदर्शन गरिरहेको क्लब इन्टर मिलानमा अनुबन्धित भएका हुन्।

२७ वर्षीय डेनमार्कका खेलाडी एरिक्सन १६.९ मिलियन पाउण्डमा इटाली गएका हुन्। टोटेनहमका लागि यो सिजनमा २८ खेल खेलिसकेका एरिक्सनले क्लबबाट दुई सय २६ खेल खेलेका छन्।

उनी सन् २०१३ मा टोटेनहममा अनुबन्धित भएका थिए। त्यसपहिले उनले आयाक्सबाट एक सय १३ खेलमा २५ गोल गरेका थिए। सन् २००७ यता उनले डेनमार्क राष्ट्रिय टिमबाट पनि खेल्दै आएका छन्।

अब भने उनले इन्टरको टिमबाट २४ नम्बरको जर्सी लगाएर खेल्ने छन्। इन्टर मिलानको अफिसियल ट्वीटरबाट पोस्ट गरिएको ट्वीटमा उनी इटाली गएको जानकारी दिइएको हो।

यसअघि नै प्रिमियर लिगका चर्चित खेलाडी लुकाकु इन्टर मिलान गएका थिए। लुकाकुले इन्टरबाट राम्रो प्रदर्शन गरिरहेका छन्। उनले डेब्यू खेलमै गोल गरेका थिए।