'ए' डिभिजन लिगमा सरस्वतीको पहिलो जित

काठमाडौं– कतार एयरवेज सहिद स्मारक ‘ए’ डिभिजन लिग फुटबलको जारी सिजनमा सरस्वती युथ क्लबले पहिलो जित दर्ता गरेको छ।

ललितपुरको सातदोबाटोस्थित एन्फा कम्पलेक्समा मंगलबार भएको पहिलो खेलमा सरस्वतीले यती हिमालयन शेर्पालाई ४–३ को गोलअन्तरले पराजित गर्यो।

सरस्वतीको जितमा कजिम एडेगोके बुसारी नायक बने । उनले दुई गोल गरे। यस्तै, विनोद केसी र मनिष थापाले एक–एक गोलको योगदान दिए।

बुसारीले खेलको पाँचौं तथा ८३ औं मिनेटमा गोल गरे । यस्तै, केसीले ३५ औं र थापाले ८८ औं मिनेटमा गोल गरे।

हिमालयन शेर्पाका लागि अनिष गुरुङ, विजय श्रेष्ठ र रवि थापामगरले समान १ गोल गरे। गुरुङले खेलको १० औं मिनेटमा, श्रेष्ठले ४५ औं मिनेटमा र थापामगरले थपिएको समयमा गोल गरे।

खेलको म्यान अफ दि म्याच बुसारी घोषित भए। 

जितसँगै ४ अंक पुगेको सरस्वती अंकतालिकाको पुछारमै कायम छ। हिमालयन शेर्पा भने १२ औं स्थानमा छ।

जारी सिजनमा मछिन्द्र १९ अंकसहित शीर्ष स्थानमा छ।