त्रिभुवन आर्मीलाई पुनः शीर्षमा उक्लने अवसर

काठमाडौं– कतार एयरवेज सहिद स्मारक ‘ए’ डिभिजन लिगमा आज दुई खेल हुँदैछन्।

आज हुने पहिलो खेलमा हिमालयन शेर्पा क्लब र सरस्वती युथ क्लब भिड्दै छन्।

मध्याह्न १२ बजे सुरु हुने पहिलो खेलमा हिमालयन शेर्पा दोस्रो जित निकाल्ने दाउमा हुनेछ। उसले ८ खेलमा एकमामात्र जित निकालेको छ भने ४ बराबरी खेलेको छ।

आजको खेलमा जित निकाल्दै हिमालयन शेर्पा नवौं स्थानमा पुग्ने दाउमा हुनेछ। 

रेलिगेसन जोनमा रहेको सरस्वती युथ क्लब पनि आजको खेलमा जित निकाल्दै पहिलो जितको अनुभव गर्ने दाउमा छ। उसले एक खेल बराबरी खेलेर १ अंक जोडेर तालिकाको पुछारमा छ।

त्यस्तै, ३ बजे सुरु हुने दोस्रो खेलमा जावलाखेल युथले त्रिभुवन आर्मी क्लबको सामना गर्ने छ।

अंक तालिकाको दोस्रो स्थानमा रहेको त्रिभुवन आर्मीलाई आजको खेल जित्दै पुनः शीर्ष स्थानमा उक्लने अवसर छ।

त्रिभुवन आर्मी अंकतालिकामा १७ अंकसहित दोस्रो स्थानमा छ। लगातार चार चरणसम्म शीर्ष स्थानमा रहेको त्रिभुवन आर्मी सोमबार दोस्रो स्थानमा झरेको हो। सोमबार भएको खेलमा मछिन्द्र थ्री स्टार क्लबलाई पराजित गर्दै शीर्ष स्थानमा उक्लिएको हो।

यता जाउलाखेल पनि आर्मीलाई रोकेर अंकतालिकामा माथि उक्लने दाउमा छ । जाउलाखेल १२ अंकसहित अंकतालिकाको सातौं स्थानमा छ।